المساعد الشخصي الرقمي

مشاهدة النسخة كاملة : اجمل ابيات فى شعر ابراهيم ابنعوف


مصعب علي سيداحمد
28-07-10, 02:52 AM
السلام عليكم
معليش انا عارف ده مامنتدى الشعر بس هو من اكثر الاقسام نشاط
من الصعب ان تجد بيت غير جميل فى شعر ابراهيم ابنعوف
لكن لديه ابيات مبالغه فى الجمال ومصعب حابى يجمع الابيات المبالغه فى الجمال
نتمنى التفاعل

سليمان عبد الله محمد نور
28-07-10, 10:27 AM
والله يا مصعب حيرتنا معاك
تجينا بعد شهر تنتاوق وترجع
الكلام ده اعوج منك.
عمر قاطع مني الخبر
الرخصة!!!!!

اشتياق القرير
28-07-10, 04:05 PM
أنا ما ياني الخضرت الحن حاحيت من فوقو جفاك وجفاي
عشعشتك في الخاطر ذكري وما كان الخاطر ليك نساي
لا انتي بتشبهك القسوة لا كت بتوقع تبقي جزاى
اتخيلي حال زولاً عاشق معشوقو إرتد عن الأخلاص !!
***
كيف تبقي تحب لو ما عانيت وما شلت الحب آلام وجراح ؟
والحب لو ما ودّر بالزول ما بكون في نظري الحب الصاح
والقلب البات بالحب مهموم احسن من قلباً نام مرتاح
وأنا عندي سماحة الريد في اتنين آنات الليل والطرف الحاس

وجدي صلاح محمد
28-07-10, 07:35 PM
مصعب ليك التحيه
سأعطيك ابيات من بعض من قصائد الاستاذ ودابنعوف أو الجبل كما يُحِب

مخلوقة تراب الجنه والطيب خالتوبو جسيمها
كان حاكا القمر محياها لو ما في القمر ضليمه

**************
عينيك فتنة فاتنه واتخلقت علي هذا الاساس
دخلت دواخل العالمين وكانت بعيدي عن المساس
حين تنزل الفوق للتحت تبدا المطابقه والجناس
اتوسط الليل الصباح فيهن مع الغرويده جاس
**********

كانت عيونك طلسمات الرهبه في العهد السليماني القديم
جلست علي عرش الجمال وسادت علي كل الاديم
أمرت جنود الحسن ان ياتوها بالقلب البيعصى الريده فيها ولا يهيم
ماأرتدا طرفها وإلا كان القلب والجرح الاليم

التحيه لك مرة اخرى والتحيه الى الاستاذ ابراهيم ابنعوف

معتز محمد علي عكود
28-07-10, 08:47 PM
لك التحية مصعب علي سيداحمد
لو هنتي علي وهانتني ايام خليني اجابد الامل الضاع
يمكن يفرد للفرحة شعاع يعبر يوت حزني ويرثيني
يرثيني علي شاطئ الاحلام في عالم مابحدو الادراك
اديني امانك اديني وحيات الريد الفي عينيك سوقيني عليهن قوديني

مصعب علي سيداحمد
29-07-10, 01:11 AM
تسلمو على المرور الاخوان سليمان واشتياق ووجدى ومعتز

مصعب علي سيداحمد
29-07-10, 01:14 AM
والله يا مصعب حيرتنا معاك
تجينا بعد شهر تنتاوق وترجع
الكلام ده اعوج منك.
عمر قاطع مني الخبر
الرخصة!!!!!

تسلم سليمان بس والله الواحد مدروش شديد بس ربك يسهل
والله عمر لسه ماطلع الرخصه لكن ساعى بس ربك يهون

مصعب علي سيداحمد
29-07-10, 01:17 AM
مصعب ليك التحيه
سأعطيك ابيات من بعض من قصائد الاستاذ ودابنعوف أو الجبل كما يُحِب

مخلوقة تراب الجنه والطيب خالتوبو جسيمها
كان حاكا القمر محياها لو ما في القمر ضليمه

**************
عينيك فتنة فاتنه واتخلقت علي هذا الاساس
دخلت دواخل العالمين وكانت بعيدي عن المساس
حين تنزل الفوق للتحت تبدا المطابقه والجناس
اتوسط الليل الصباح فيهن مع الغرويده جاس
**********

كانت عيونك طلسمات الرهبه في العهد السليماني القديم
جلست علي عرش الجمال وسادت علي كل الاديم
أمرت جنود الحسن ان ياتوها بالقلب البيعصى الريده فيها ولا يهيم
ماأرتدا طرفها وإلا كان القلب والجرح الاليم

التحيه لك مرة اخرى والتحيه الى الاستاذ ابراهيم ابنعوف
تسلم والله بالجد ود ابنعوف مبدع
ومشكووووووووووور

مصعب علي سيداحمد
29-07-10, 01:20 AM
أنا ما ياني الخضرت الحن حاحيت من فوقو جفاك وجفاي
عشعشتك في الخاطر ذكري وما كان الخاطر ليك نساي
لا انتي بتشبهك القسوة لا كت بتوقع تبقي جزاى
اتخيلي حال زولاً عاشق معشوقو إرتد عن الأخلاص !!
***
كيف تبقي تحب لو ما عانيت وما شلت الحب آلام وجراح ؟
والحب لو ما ودّر بالزول ما بكون في نظري الحب الصاح
والقلب البات بالحب مهموم احسن من قلباً نام مرتاح
وأنا عندي سماحة الريد في اتنين آنات الليل والطرف الحاس

تسلمى الاخت اشتياق نعم الاختيار
وربنا يحفظ ود ابنعوف

مصعب علي سيداحمد
29-07-10, 01:39 AM
القصيده دى كلها حلوه
سماحة عيون

تشيلك تهاجر بلا إغتراب .. تثير في شعورك حلاوة العذاب
عجيبات عيونك عيونك عجاب
***
عيونك تحير عقول الشباب .. تعاين تغرود تقولك حباب
تقودني لي عوالم الهوي المستطاب .. عيونك تعاويذ بتشفي المصاب
***
عيونك تشكل فواتح كتاب .. كتاب بين سجله الدعاء المستجاب
قلوب خاشعة تطلب جزيل الثواب .. دراويش ونوبه ومدايح شباب
***
مطيراً تبشر تبل التراب .. تساري وتفرح عطيش اليباب
يضاحك بريقا رواحل السحاب .. تصحي الأماني يخدر سراب
***
عيونك تجهجة فصيح الخطاب .. يحاول يعبر يخونه الصواب
يعاين رموشن تجذبه إنجذاب .. يصارع هواهن يكون فكره غاب
***
سماحة عيونك يقولوا الصحاب .. سماحة غنانا ونغيم الرباب
البفصل منانا وحديث كل باب .. (البشاهد) عيونك يكون غاب وجاب
***
سماحة عيونك رجوع للعقاب .. وكليمة أحبك تبروز خطاب
سمرنا وحجانا ولذيذ المطاب .. وقميرة فريقنا التتاوق الضباب
***
متين لي عيونك بتصبح قراب .. وأشوف الحنين في صفاهن مذاب
يشع فوق قليب بينه بينك حجاب .. يخاف التلاقي البعقبو الغياب
***
عيون في جمالن تسام الرقاب .. وعشانن يهونن قواسي الصعاب
سؤال لي جلالك يدور الجواب .. منو الشاف عيونك ورجع تاني تاب ؟

سيف الدين محمد الامين
29-07-10, 02:01 AM
بالمناسبة ؛ هل القصيدة التي مطلعها :

شوقي انا للبلد بى حالا واالشوق للترابلة اهلي

هي للشاعر ابراهم ابنعوف ؟

محمد إبنعوف محمد طه
29-07-10, 09:26 AM
هذه الابيات من قصيدة مرارة اللقيا

يا سابلي النظر تالاي مالك ما بتعايني لي
خايفي تشوفي حالي الفيهو ما انتي الفرضتي علي
حزني عليك اقول اخفيهو يفضحني ويبين في وشي
ما بين الحزن والذكرى تمتزج الدموع باشواقي
****
لا لا انا ما بكيت من ضعفي نفسي انا في هواك ابية
باكي علي ضياعك انتي واتنين راح يروحو ضحية
لو حكمتي نفسك تلقي بينك وبيني مافي قضية
الا بس الاباليس حامو واغروك ترضي بيهو فراقي

محمد إبنعوف محمد طه
29-07-10, 09:29 AM
وايه يعني الخصام بيناتنا عشان ناس المحبة سماحة
والفي قلبي اكبرواقوى من اقسى واشيلي قباحة
عنك قلبي ما متخلي لو قام السبيب في الراحة
راجيك يا منايا تطلي لي ابواب عذابي تتاقي

ما رأيكم في (if 2) دي ( لو قام السبيب في الراحة)

محمد إبنعوف محمد طه
29-07-10, 09:42 AM
أهواكي طوعاً واحتمل ويلات هواكي جنس جنس
أهواكي غصباً كونو انو هواكي لي نبضا وحس
أهواك موهدب بين صراع اللقيا والخوف والوجس
أهواك قدر مكتوب علي كيفن من القدر احترس ؟!

محمد إبنعوف محمد طه
29-07-10, 09:44 AM
وآحسرتي وحسرت عيون ذرفت دموعا علي أمس
علي صفاكي وروعتك وحديثك العذب السلس
من بعدك الايام خلن والعيشة فيها بلا نفس
كيفن يضوق طعما ويروق زول فصل الاحزان لبس ؟


ونواصل

عوض باشاب
29-07-10, 11:35 AM
الناس بي شوق نبيها من المالح فاتو قادي
وإنتي حبًك جابني تنقاسي أحج فيها أول تبادي

(ليه ماكتب وليه ما أغني)

المعز التلب
29-07-10, 11:44 AM
ضميـنـى ضميـنـى يــا فـرحــة الـمـحـزون
لا الصبر قادر اطيق لا الضم معاهو سكون
يـا عايشـة فـى جـواى بيكـى الفـؤاد ملـيـان
أنـا مـن بعيـد جاييـك شـارد مــن الاحــزان
غفلتـا قــدرى وجـيـت لاقيـنـى بالاحـضـان
لفينـى فـى جيـدك طــوق والبسيـنـى كـمـان

محمد إبنعوف محمد طه
29-07-10, 12:33 PM
حاولت ان انتقي ابياتا من هذه القصيدة فانتقيتها كلها !!!!!

نشوف غرويده صحاك ... ونقولّك يانايمي أصْحى
نودّر وننسى انو ناعسى ... ناعس الله منو البصِحّي ؟
***
نومي اصحي على غرورك ... معاك لازال التحديّ
واي طريقا يوصّل... لي قلبك مني سديّ
ده كان تلقيلو صبراً... يماثل صبري وتمديّ !!
صبري عليك اني صابر ... تشققي قلبي وتلِحّي
***
كدي ابعدي كل العواطف... اشاورك من وين ضروري
يازيدي مواجعك علي ... يارجعي فرحي وسروري
في الحالتين راضي عنك ... تنصفي أو كان تجوري
سمح حكمك زي سماحتك ... وبرضو قِسمة الله سمحي
***
اوع تغرّك سماحتك ... سماحة الغنا ياني سيدا
سماح يبلى مع الليالي ... وتبقى سماحة القصيدة
اخلخل بيها المشاعر... واتوَها ازمان عديدة
فكرتا انتي وبيانا ... كدي اقدري من عقلي زحِي
***
أوانفذي كل ما استطعتي ... مداركي أبعد من سماكي
جوبي اراضيك تلقي ... فنوني تهاجر وراكي
اسلكي كل العوالم ... خيالي بيدرك مداكي
وانا الكون المحتويك ... قصيدة في الجوف توحِّي
***
احبك يسعدني حبك ... وكت يبقى حلوه مُرّو
احبك غًلبا يقطّع ... والملمو في الجوف واصُرّو
انا المجنون البيعشق ... مرامي الريده التضُرّو
قبلا ن بي ضرري راضي ... منو القال ليّك انتي ضحًّى؟
# # # #
شيشك ببشيشك اصحى ... صحاك ونومك يشفّق
وجيبي جفاك وازرعيه ... قصاد الحِنّ المدفِقّ
كفاية اشوف في عيونك ... تغني الدنيا وتصفق
بعد داك نومي اطمئنّي ... ولومك في خاطري مَمْحِي

مصعب علي سيداحمد
29-07-10, 09:31 PM
تسلموا يا شباب على المرور
وتسلم محمد ابنعوف نتمنى انك تواصل وتتحفنا

هاشم محمد صديق(قرقر)
16-08-10, 09:09 PM
كان حاكا القمر محياها لو ما في القمر ضليمه
بالجد محيرنى البيت ده شديد وين المشبه وين المشبه به

محمد كمال
16-08-10, 09:58 PM
بكتب ليك
دي اكتر قصيدة بتعجبني في قصايد ود ابنعوف غناها المرحوم يس عبدالعظيم

بكتب ليك وأطوِّل فى كتاباتى
يفيض إحساسى وأملا الدنيا
بى كلمات خطاباتى

بجمع ليك لغات الدنيا وأكتب ليك
بى لغة العجم مرات
وبالعربى الشديد وفصيح
وبى لغة الملايكة أحيان
وبالسريانى والتسبيح
وفوق كل ذرة فى ها الكون
بكتبا ليكى وارسلا فوق بساط الريح

بكتب ليك على الأشجار .. وفى الأنهار
ومحل ما تمشى قدامك
تلاقى حروف رسالاتى
لأنك إنتى من ذاتى .. وفى ذاتى .. يا ذاتى
ومهما كتبت ما بقدر أعبر ليك عن الجواي
مهما طاوعت أقلامى كلماتى

وليه ما أكتب وإنتى الماضى بى أحزانو
بى أفراحو والمستقبل الآتى
كتاباتك شوية خلاص .. ورسالاتك شوية خلاص
علىَّ الفى منامى أحلام .. علىّ الفى صحاى وسواس
وأنا الراجيكى تكتبى لىَّ .. كم دفتر وكم كرَّاس
منَّها داير أفصِّل جبة وانْدروشْ ..
وكمان طاقيِّى فوق الراس
ومن كلماتا أسوى السبحى والبخرات وكم حجبات
أداريبن عيون النَّاس
كمان تقروقة .. وفى محراب هواكى اجلس مع الجُلاّس
واخلى الباقى واتغتابو .. لو بعدك غشانى نُعاس

أنا الراجيكى تكتبى لى ..
كتاباتك تكون فى الظلمة لى نبراس
أنا العايش فراقك لى ..
بشوفك فى عيون النَّاس
وعازرك لو كتبتى قليل ..رضيان بيهو
ما دام بى وفا وإخلاص
أريت يومن فرقنى معاك ..
يكون محذوف من التاريخ ..
وتبقى أيامنا ستة .. ونبقى فيها قراب
أريت بلدن تحرمك منى ..
لو ما إنتى تبقى خراب
يسكن فى خرابا البوم ..
ويتصايح عليها غراب
تولِّع فيها نار الله ..
وتصبح كوم رماد وهباب
وتمرقى إنتى والنَّاس المعاكى قراب

ود حمرى
16-08-10, 11:57 PM
قالولى بترجا الشافعة قلت ليهم لو بترضع
قالولى صباك ضايع قلت ليهم ليها برجع

الوليد الجنابي
20-08-10, 06:02 PM
كيف تبدأ تحب لو ما عانيت
وماشلت الحب آلام وجراح
الحب لو ما ودر بالزول
مابكون في نظري الحب الصاح

ابوالقاسم عكود
27-08-10, 05:47 PM
شيشك ببشيشك اصحى ... صحاك ونومك يشفّق
وجيبي جفاك وازرعيه ... قصاد الحِنّ المدفِقّ

دهـ كلام عجيب والله
لاحظ انو طلب منها انها تزرع جفاها وين ، ويسقيهو ب حنو ؟؟؟
والله كلام ....

محمد إبنعوف محمد طه
05-10-10, 02:34 PM
في حترب البال الموقّع *** من جدار عقلا مقرّب ينسهك
وين انت من طول الرجا *** وحبل الهوى الماب يتمسك
وصبرا التّقو بالصبر *** ومن تاني يرهف وينهتك

محمد إبنعوف محمد طه
05-10-10, 03:25 PM
التمر بالفرحة صفق وعمر الدارة الكبيري
فوقو قمري ترك نواحو غنى ساير بالدخيري
والرباب فوق قوزنا جافا النومة للدغش البديري
حسو بارى النسمة غرب عدى في بحر الدميري
والقرير باشعاري غنى وليها كتر في الشكيري
أوسلي لابسة خدارا ترقص قالدي مساوي الجزيري

احمد عبد الوهاب
06-10-10, 12:22 AM
قالوا ود عينينيكي نظرتو ماب تجلي
يبين يظهر وكت حاجبك تعلي
علي مين تاني سيفك دار تسلي....؟
علي انا الريقي ما قادر ادلي

السهل الممتنع

يقول علماء الشعر العامي ان هذا ابلغ بيت شعر قيل في الاستسلام واخضاع النفس للمحبوب وفعل الوجد والبعد عن المحبوب وان هذه القصيدة مجتمعة يشتكي فيها الشاعر الي المحبوب ماصار اليه من الام الفراق ويستشهد ببعض قصائده علي ذلك ...يقول:
السحيبات قتلن فوق داره طلي
ولم تطلع حدثنها بالحصل لي
جني يبكن تاني من تيهك شكن لي
وبرضو انتي تقولي خبرك ما وصل لي
....في اشارة واضحة الي قصيدته السحيبات التي يقول فيها :
ابكن ياسحيبات ماكفاية بكيت
واديكن روي وانا بالدموع مارويت
الي ان يقول :
روح ياسحاب فلل عليك الليل
واغريهو السلام فوق دارو كان مريت
وبعد الحول تعال غاشيني جيبلي اخبارو
برجاك في محلي دا كان بقيت حيييت
وان بقي مالقيتني احزن علي ونوح
واعرفني بالشوق مته واتفكيت......
وفي نفس القصيدة يقول :
لاطيور الجني ليك اترسلن لي
الحنينات روحن لك وجن حكن لي
لقنك تقدلي ولي ايدك تتلي ولي
مسايرك تربطي ومرات تحلي
.... في اشارة واضحة الي قصيدته طير الغروب التي مطلعها يقول :
طير الغروب اسكت كفاكا رطن
....التي يقول في جزء منها:
اتحير بقيت في امري متمحن
احفر في الارض ومرات براي ادفن
كل البشتكيلو اقولو لي طمن
يقول لي ماب تطيب انت اتمكنت مكن
.....والتي يختمها بختام اجمل ما يكون...ولنا حولها حديث يطول سوف نستعرضها ان شاء الله........مع حبي

ود ابنعوف
06-10-10, 01:22 PM
السلام عليكم
معليش انا عارف ده مامنتدى الشعر بس هو من اكثر الاقسام نشاط
من الصعب ان تجد بيت غير جميل فى شعر ابراهيم ابنعوف
لكن لديه ابيات مبالغه فى الجمال ومصعب حابى يجمع الابيات المبالغه فى الجمال
نتمنى التفاعل
______________________________________________

ال مسعود طابت صباحاتك , وتحياتى ليك وللمتداخلين بقدر هذه الحروف التى سطرتها من بنات الافكار
وكانت ملك لكم لا ينيبنى فيها الا اعجابكم بها . وحيث لا يجوز لى مداخلتكم الا بالشكر الذى انتم اهل له
ولكن استميحكم واستأذنكم فى ان اهدى هذا النص لك وللمتداخلين والاداره وجميع اهلى بالقرير ومساوى
والبركل ثم اوسلى وكل المواقع التى تلهج ب ( ايّى أيّى ÷يّى ) اكرر استأذانى والى النص ..
انت رجاى

يا مجدوله فى خاطر الخاطر .. غنوه حزينه تصحّى غناى
كيفن أرحل أفوت دنياكــى ؟! وابــعد عـــنك وانت رجــاى
***
آه يا ساحره .. سحرتى عيونى واتهايل فى صدرى هواى
وحياتك ما قادر اقارن بين حسنــك , وبين سحــــــر الآى
غير ما الدهشه تقود لى دهشه واقول سبحانك يا مولاى!
أىّ شى فيك بالروعه يسبّح ويحكى صنيــع قـادراً سـوّاى
***
كم صحّيتى هواجس شعرى وكم غنّيتك .. فـــى الدّوبــاى
وكم ساهرت الليل فــى بعــدك .. اتأمل نجمـــو الضّــوّاى
ان كان ألقـــى ملامحــك بينو .. ولاّ يكــون للتــاه هــدّاى
انت مصير مكتوب أمشيهو حزنو وفرحو انا زول غوّاى
***
واصدى ابواب افكارى عليكى ! بيكى بقيت للناس نسّاى
أنسى الدنيا , ولا انساكى . كيف أنسى العايش جوّاى ؟؟
اذكر اسمو ملاقى صباحى .. واستقبل بى اسمو مســـاى
بيناتن , وانا فى محرابو .. لامن يرحل منّى ضحــــاى!!
***
طاريك والاشواق تتزاحم .. فوق درباً سارتبــو خطــــاى
طاريك والاحزان تتهافت .. ودمـــع العين فاقــد الوكّــاى
طاريكى ومرساى عينيكى وغيرعينيك عدمان مرســاى
طاريكى , وخلّينى أكابد .. طول سهرى وأحزانــى بــراى
***
ما متراجع يوم عن حبك .. حتى ان بعدك يبقـى سمـــــاى
رغم ظلام أيامى الدّامس .. وحاجب نــور شمسك تــالاى
ورغم احساسى الماب يلقاكى وما بى تجود يوم بيك دنباى
الاّ بحبك , أقدّس حبــك .. وافديكــى .. ويفديكــى دمــــاى
***
أيوه , بحــبك زمنــاً عــدّى .. ولسّ بحبــك زمنــاً جــــاى
تاه من بعدك , حسن غنايا , وألحانــى , واتكســر النّــاى
وما فضّل غير حزنى البتّق .. تسقى دموع سحبــاً بكّـــاى
بحضن شوقك لامن اصادفك , ولمّن اصادفك يبقى كفــاى

د. ميرغني حسن عثمان
06-10-10, 04:22 PM
يا زولي الوسيم ليه البعاد وايه لازم الجفا بعد الوداد
قصدت عذابي ما هماك رضاي وكم لرضاك جافيت العباد
احاول النوم اقول في الطيف اقابلك لكن للجريح صعب الرقاد
لو لا الدموع الفيها عائم كان جسمي احترق واصبح رماد
شحب لوني واصبح جسمي هيكل التقول في الدنيا مخلوق قبل عاد
حضروا نعشي واكتبوا فوق قبري شهيد بالحب قتيلك يا وداد

محمد إبنعوف محمد طه
18-03-12, 03:56 PM
فكرتا انتي وبيانا
كدي اقدري من عقلي زِحِّي

محمد إبنعوف محمد طه
29-04-12, 12:36 PM
فكرتا انتي وبيانا
كدي اقدري من عقلي زِحِّي

في تحدي اكبر من كدي ؟؟ !!

مجاهد احمد
19-09-12, 06:05 AM
اريت ليلاً يشيلني معاك لي بلداً بعيده سفر
بلداً لافي زول طلاها لا زولاً يجيبلو خبر
ووكت الليل يعم الكون وفوق لرباه يتحكر
يسدل من ضفايرو السود وإتوسد ضفايرو أسهر

عبد المنعم عبد الرحيم حضيري
06-03-14, 10:46 AM
وايه يعني الخصام بيناتنا عشان ناس المحبة سماحة
والفي قلبي اكبرواقوى من اقسى واشيلي قباحة
عنك قلبي ما متخلي لو قام السبيب في الراحة
راجيك يا منايا تطلي لي ابواب عذابي تتاقي

ما رأيكم في (if 2) دي ( لو قام السبيب في الراحة)





تعرف يا محمد دا تعبير أبلغ من تعبير قيس بن ذريح القال:

لقد ثبتت بالقلب منك مودة كما ثبت بالراحتين الأصابع
وحُرّم هوي غيرك على قلبي كما حُرّمت على موسى المراضع

ود أبنعو جد خطير

احمد محمد صالح بادي
06-03-14, 12:31 PM
كان حاكا القمر محياها لو ما في القمر ضليمه
بالجد محيرنى البيت ده شديد وين المشبه وين المشبه به

يقول شاعرنا المبدع أن الـْمُقل فى عيون محبوبته، مستديره كالقمر عندما يكتمل، تتوهج بياضاً مِثـْلـِه، وكان يمكن أن يكون هذا المحيا هو صورة طبق الأصل للقمر، لكن نظراً لوجود سواد العين فى وسط هذا التوهج قد حدث هذا الإختلاف، وبالطبع يتفوق محياها على القمر لأنه قد جمع الضدين شدة السواد ( ضليمه) مع شدة البياض ومن هنا ينبع الجمال.
هذا والله أعلم، مجرد رأى.

عبد المنعم عبد الرحيم حضيري
08-03-14, 11:27 AM
يا سليمان ...ياخي الصفحة التانية من البوست مابتفتح معانا شكلو فايرز لأنو أول ما تنقر عليها وبتفتح معاك صفحة باللغة الإنجليزية ... بالله شوف لها حللز

تحياتي