وأخيرا .. الجميلابي .. حرا طلي... [ الكاتب : علي محمد أحمد (أبورنس) - آخر الردود : فتح الرحمن احمد - ]       »     عُــــدنا ***والعـــــود ‘ن شا... [ الكاتب : احمد عبدالله جقلاب - آخر الردود : عبد الرحمن (عطبرة) - ]       »     انا استجبت للنداء [ الكاتب : ابراهيم على كرار - آخر الردود : عبد الرحمن (عطبرة) - ]       »     أصلي ما كان في مُرادي يوم أفار... [ الكاتب : ابراهيم على كرار - آخر الردود : درماس - ]       »     حكمــــــــــة اليـــــوم [ الكاتب : احمد عبدالله جقلاب - آخر الردود : درماس - ]       »     عفواً سونا.. بقلم الأستاذ [ الكاتب : عمر محمد نور - آخر الردود : عبد المنعم عبد الرحيم حضيري - ]       »     استراحة ما بعد الظهيرة [ الكاتب : أم مؤيد - آخر الردود : عمر محمد نور - ]       »     دفتر الحضور اليومي [ الكاتب : عبد المنعم عبد الرحيم حضيري - آخر الردود : أم مؤيد - ]       »     أول رواية عربية تبنى بمفاهيم ا... [ الكاتب : عمر قرافى - آخر الردود : عبد المنعم عبد الرحيم حضيري - ]       »     ابو ابو رنس.... ابو شيبة ... س... [ الكاتب : عبد المنعم عبد الرحيم حضيري - آخر الردود : عبد المنعم عبد الرحيم حضيري - ]       »     الدوام لله الزلال بنت الشمال [ الكاتب : ابراهيم الصيني - آخر الردود : ابراهيم الصيني - ]       »     هل إستنوق الجمل ،،، أم ماذا [ الكاتب : درماس - آخر الردود : درماس - ]       »     غلبني من اندهاشي اطلع.. بقلم ا... [ الكاتب : عمر محمد نور - آخر الردود : عمر محمد نور - ]       »     فوائد ودرر [ الكاتب : فتح الرحمن احمد - آخر الردود : أمين عبدالله - ]       »     آجماعة وينن ،،،، [ الكاتب : درماس - آخر الردود : احمد عثمان بشير - ]       »     المتواجدون [ الكاتب : درماس - آخر الردود : أم مؤيد - ]       »     كـُـلـُــنـْـكـَـاكـُــولْ [ الكاتب : درماس - آخر الردود : درماس - ]       »     الكوراك والكواريك . [ الكاتب : عبد المنعم محمد توب السوق - آخر الردود : عبد المنعم محمد توب السوق - ]       »     عبدالله الرفاعي . [ الكاتب : عبد المنعم محمد توب السوق - آخر الردود : عبد المنعم محمد توب السوق - ]       »     رسائل منتشرة في الواتس اب وهي... [ الكاتب : فتح الرحمن احمد - آخر الردود : درماس - ]       »    

تسجيل خروج البحث تحكم العضو التسجيل الرئيسية


 
 
العودة   منتديات القـريـر > قــــائمة المنتديــــات > المنتدى الأدبي > مكتبة عبد المنعم محمد توب السوق(الفنجري)
 
 

الإهداءات

إضافة رد
 
أدوات الموضوع انواع عرض الموضوع
 
 
  #1  
قديم 25-09-17, 11:51 PM
عبد المنعم محمد توب السوق غير متواجد حالياً
قريرابي نشط
 





افتراضي الكوراك والكواريك .

[2017/9/2 6:12 م] elfangari9949: *الكوراك والكواريك*
1-
ياربي الخلق دي تكورك مالا ، والكواريك لزومه شنو؟
تلقى الجماعة جنب بعض ويتونسوا والكلام يصل تالت ساقي والصدى في راس التمر يسوي دل ، دل ، ون ، ون .
ياخي التيراب المسنوح دا قام افراق ماهو سمح ، يقولو التيراب السمح عند ابوعبيدة قريب ليك هني ماشي غادي مالك ، والعجلي الكانت منفوخة حصلها شنو؟ ، يا زول انت فلان ماهو جاي للعرس ، ياربي قطر امس ما جاب سفّار .
لا لا قالوا متقطّع في الدغفلي والسيل شال القضيب والتصليح ياخدلو سبع يوم ، واحد من تالت ساقي لا لا فلان شغّال في الدريسي وقال ياخدلو عشرة يوم والكلام مسموع عادي ، وقالوا واحد كفّى القطر كلّو اكل وشراب وقالوا معرّس اربعة حريم ، راجل كلس ، هسع عمك جادالله دا كان طبق ما كان كفّى السفّار ديل ؟
عمك جادالله :- يطبق نفسك ما تعرّس انت .
يدخل ودالبصير في الموضوع :- والله يا سيداحمد انت كايس مشاكل يعني يقدر يعرّس فوق بت احمد ، والله تعلّقو معلاق الحرجوني .
والضحك يجلجل في التمر والشدر .
عمك جادالله :- نحنا الله يدينا راحت العنقريب ، الكلام الصبيان ديل ، اه اتقدم ,آ سيداحمد فشان نفشوف الفراسة والكضب دا ، انت قايلني بت العيني مابعرفا ، والله تفندكك فنديك .
وتاني يعلو الضحك .
سيداحمد :- عوك يا فلان ، المويه خبرا شنو؟ ماها جاي .
عمك جادالله :- ود الذين ، اي طرطش الكلام وسوي الحديث في المويه .
ود البصير :- يا سيداحمد قبيل مالك تقلّب في الدرّاب لامن تلدغ ، وعارف يا عمي جادالله كمان الحكاية بقت فيها حاجات حديثة ( الصبغي ، وغاز البتجاز ، والزيت الحار ، واللبن الحار ) .
واحد من رابع ساقي يشارك في الونسي والضحك ، ويقولو نسيت الجاز والكبريتي .
عمك جادالله :- لا حولة ولا قوة يعني الحكاي وصلت لا كدي ! ان بقى كدي سيداحمد يشوف خبر الموية اخيرلو .
وتاني الضحك يجلجل .
كمان الجماعة في البص وجالسين في كنبة واحدة ويتونسوا ، فلان كان معانا في الجيش زول مستهبل خلاص ويحكي قصة والتاني من النوع الضحّاك وتبدا ضحكته متل صوت وابور اللستر في بداية التشغيل كك ،كك، كك ، وبعد داك تجيبلها جرّة كااااك متل صوت الديك ، ويمكن تجبيب لبعة في الضهر ولا صفقة مع دقت الرجل مرتين او تلاتة والبص يهتز والصخب يدوي من اول البص الى اخر مقعد .
ياخي نحنا نكورك كوريك !
كمان الحريم في محل المناسبة ، الدنيا فايري.....

ونواصل باذن الله .

عبد المنعم الفنجري .
[2017/9/6 6:22 ص] elfangari9949: *الكوراك والكواريك*
2-
يا ربي الخلق دي تكورك مالا ، والكواريك لزومه شنو؟

كمان الحريم في محل المناسبة ، الدنيا فايري ما تعرف البتتحدّث من المستمعة والزومة ضايقي زي ما قال الفنان بنده رحمه الله ، واللوم انتي ما جيتيني في عرس ولدي وما بكيتي معاي ابوي ، وانتي ما تلويني فشان امي مرضاني وراقدي في المستشفى شهر كامل البعيد والقريب جا شافه انتي مالك ، حسونة جارتك جات كم مرات شافته يعني ما سمعتي! بس قاطعاهو معاكي لا بيني ولا بينك من يوم الليلي شوفن يااخواتي كمان تلوم ، واحدة من هناك تتوسط وتقولها اعذريها كانت مسافري ، وبعد حجي طويلي يتم الصلح ويستمر الحديث فوق توب فلاني ونقشة الحنة وفلاني وكشكيش الدهب وفلاني والصحة العليها وعدم الولادي والدنيي فايري ، ويطلعن من المناسبة وفي البص ، انت يا بتول فلانة ديك وين ؟ والصوت يجي حاد وسنين ويرن في جنبات البص كلها .
اي يا يمّه ما رحلوا وبنو بيت في الدروشاب وولدا المغترب جاء عرّس وبنتها نفست ،والله متلوّم معاها ما مشيت ليها ، وفلانة امها راقدي في المستشفى وفلانة بنتها طلقوها ، كر يايمه ليه! ، اي اسكتي انا عارفاها ما بتنستر ، بت غبياني ومبشتنه ، نان فلانه ما حريصة ما تعلم بنتها الخدمي ! يا اخيتي بنات الزمن دا متفلقصات وما بيدورن الخدمي . وما قلتليك فلانة ديك عرسو فوقا وعاد ما صحبتنا ، مشينا ليها وقلنا ليها ( عليتي ما بليتي ) وما يهمك ولا يخص قعر اضانك انت ولادك ما شاء الله ويا حجاب الله ما يحوجوك لي شي ، لكن برضها زعلاني ماني عارفي الراجل الكرفسون دا تسوي بيهو شنو ! عندني المصران اكل مسلوق ، عندي الضغط ما تزيدوا الملح ، عندي القاوت ، وقالوا عرسلو فتاتا بايري طولت قاعدي ، يا شيخة خليها تتبالابو غادي غادي ، نان ما قالن .
الشايب دا الله بيني وبينو
تطير الابرة تقد ود عينو
هههههههههي وقرقر
نان ما سمعتي
راجل المرة حلو حلا
يا يمه البورة كترت واليسوّنو ما عارفاتنو .
طبعا الونسي كلها والبص كلو يسمع .
واحد في المقاعد الامامية ويعرف حاجة بتول وزوجها حاج عثمان ، قالها يا حاجي بتول قررنا انا وحاج عثمان نتزوج ونبرّد الشيب دا رايك شنو؟
حاجي بتول بهجمة يبرد حيلك وتحج في جبال الحسانية ، حاج عثمان قالك داير يعرس ؟
فلان نان هسع ما قلتي الكرفسون دا تسوي بيهو شنو !
بتول نان حاج عثمان كرفسون ؟
كيف يصلي فوق الكرسي ويقوم بي اربعاتو ، ونحنا عملنا جميعة اسمها جميعة زواج الكرفسون من اثنين وتلاتة عشان واحدة تجكّن الضهر وواحدة تجكّن الرجول وواحدة للقرفة في الشاي والجنزبيل في اللبن .
حاجة بتول قالولك نحن مقصرين .
فلان وبعدين الجماعة يطلعواشباب والكراسي الفي الجامع توول ليكم .
حاجة بتول خلاص استبد بها الزعل ، دا منو هو البيتفاصح من قبيل دا ؟
واحد قالها دا عزالدين .
حاجة بتول عزالدين ود كلتوم ؟ تنقطع ريحتك آ مقطوع الريحي ، اصبر ان ما حدثتلك امك تقطّعلك جضومك القلاد ديل .
والبص كله ينفجر بالضحك .

ونواصل باذن الله.....

عبدالمنعم الفنجري .
[2017/9/9 12:22 ص] elfangari9949: *الكوراك والكواريك*
3-
يا ربي الخلق دي تكورك مالا ، والكواريك لزومه شنو؟

لكن الكواريك ليست عندنا وحدنا ، المصريين ابو الكواريك زاتو وكمان يزيدوا حروف على الكلمة لزوم الصياح ، هاش واووش .
ماشفتهاش وما شفتووش ، والفلاتة اذا لهم مبيت في خلوة ولا جامع ، اليوم داك الجيران ما يشوفوا النوم ، واليمانية معاها جن ، تعال ياجنّي وين يا جنّي والصوماليين تقول العكاكيز هسع تقوم وتلقاها هي ونسة عادية ، ويا زول اكان شفت البنقلادشيين شي عجيب ، كلو نهري مع اوو ، اوو ، زي واحد يكتبلو في خطاب لي ولدو وهو يكورك زعلان ، قالولوا لا تكورك الكلام مكتوب ،قال لا لا اكتبولوا النهّير دا عشان يعرفني انّي زعلان .
لكن ياربي دا من شنو؟
عدم تقدير للتحدث بقدر السمع ولا عدم ثقافة ولا زهج من الفلس ولا وجود اامساحة الواسعة والشخص يجد راحة في اطلاق العنان لحلقومه .
يعني ما شفت ولا سمعت خواجة يكورك ، يا تووووم ، عووك يا جووون ويا جونسووون ولا ضحكة مجلجلة وصفقة ودق كراع .
شاهدنا تشييد قاعة الصداقة وقصر الشباب والاطفال ، صينيين وكوريين لم نسمع غير صوت الالات ليل نهار وما شاهدنا واحد في قهوة خالف رجل على رجل يمتص شيسة ولا امام دكان ولا لا يتجول في السوق .
اما الجماعة عندنا يخرجون للفطور ولا يعودون الا بعد الساعة العاشرة والذي ياتي في نصف الدوام والعذر قريب جارنا اتوفى ولا زرت جارنا في المستشفى ومصالح الناس معطلة ويقولك ياخي تعال باكر هي الدنيا طايرة والعمر يضيع والمصالح تتوقف والكل يقول ياخي سيبك الله كريم .
اه الناس عرفناهم كمان ديل في شنو؟ هسع بقر الخواجات ديل ما يكوركن ، لكن يكوركن ليه ، لا عشاها اتخّر ولا حليبها فات مواعيده ، نحن بقرتنا هي في الحواشة حسها يجيب الطاش ، يا جماعة جيبوا قبضت القش ان نطفحها وتعالوا شيلو لبنكم ، حبل في القرون والاضان قربت تنقطع وكتيف الرجول للحليب ، يا خي انتوا ما سمعتو بجمعية الرفق بالحيوان ، دا شنو ديل ، نقوم نهج نخليها ليكم البلد دي !
ونواصل.....

عبدالمنعم الفنجري
[2017/9/10 6:35 م] elfangari9949: *الكوراك والكواريك*
4-
ياربي الخلق دي تكورك مالا ، والكواريك لزومه شنو؟

تواصل البقرة الاحتجاج ، قالت يقولي تكوركي مالك ! اي اكورك واكورك ، هسع البقر العينك شافتن في التلفزيون ما شفت الحظائر النظيفة وهناقر الظل والبياطرة واقفين علي شباباتن اي مرض اي تعب يلحقوا في الحين ، وانت لامن تكمّل نومك نحن في الشمس والصنّانة وبعدين تودينا علي ترعة ولا بير نقطفلنا موية وعلي ضل شجرة رقراق ولا ضل تمرة شايلا الهوا مو معروف تقع فوق منو ، كمان الواحدي فينا تتنفخ لامن تقرّب على الموت ، يقولولك اسقوها العطرون ، اسقوها ملح العرب والتاني يقول اوقدوا النار تحت بطنها ، بالله مابتخجلوا ، يا ريت كان بقينا متل رفاقتنا المتوحشين ، يرعوا في الوديان ويبرطعوا في البراري ، لا ضبح لا سلخ ولا قسمة لبن وليداتها ، ونحن رضينا بالهم والهم مو راضي بينا ،كمان شوف قل الحسبي ! الواحد ان بقى زعلان من جماعة ، يقولهم عالم بقر .
البقر مالن ! مابيدوك اللبن البتجغم فيهو ليل ونهار وتسوّي الجبنة والسمن والكرارة وتلغف مسوّي كرشك الكبيري دي ، هسع نفوت واللبن ينقطع وتجيك الملاريا تخليك تهضرب والقوما تغلبك ، كمان البيحيّر قال البقر يمسكو الجن ، عمرك شفت بقرة جابوها لي فقير مكتّفه عشان يعزم ويطب جنّها ولا دخّلوها مستشفى المجانين ، وطبعا انتوا خجلانين من كلمة مجانين سميتوها الصحة النفسية ، والجن ياهو الجن ، تغيروا تبدلوا ، دا جنّكن انتوا ،نحن لابنشرب خمرة ولابنستعمل مخدرات .
هسع البيسموها مصارعة الثيران والبطعنوها بالرماح عشان تهيج وتفنجط والبنفروها عشان تزكهم ويجروا قدامها .
اه المجانين ديل ولا نحنا ؟
ياخي الوجع كتير ، كمان رفيقات الدرب يا حليلن البهائم يكوركن لاعند المغارب ، باع ،باع ، ميغ ، ميغ ، يازول جيب المادوغة دي ، انت ماك عارف مواعيد النومة جات وعندنا بطان صغار ، انت مالقيت تقيف قدام الدكان الا هسع يا زول اديتنا الجوع والسهر .
نهج نخليها ليكم البلد دي ولا شنو؟
ونواصل.......

عبدالمنعم الفنجري
[2017/9/12 6:11 م] elfangari9949: *الكوراك والكواريك*
5-
ياربي الخلق دي تكورك مالا، والكواريك لزومه شنو؟

واحد من القطط جا لي صاحبو كدّوس ، يقول لي برّة الحمدلله على السلامة ويسأل من السبب .
كدّوس :- يروي القصة وقال الراجل ابوراسا قليد دا ، امس برّة تكورك لي ولادها قام ينهر ويكورك وفلعها بي مركوب جلد بقر قرّب يكسّر ضلوعا ولا هسع تعباني وعامل فيها منزعج ، نان انت طول الليل تشخّر وحامي الخلق النوم والفيران والدبيان حايمات جمبك وانت ماك جايب خبر .هسع انت من المغارب ولا عند الصباح شايف حاجة ، ما نحنا شايفين كل شي، كان الواحد يخلي الفيران تدخل المخزن وتعدّموا الحباي .
امس القريبي دي العقرب كانت ماشي على المركوب داير تدخل فيهو علّا لحقتها وفطّستها واكلتها ، كان اخلبها تلدغك لكن نحنا نشتغل بضمير مش زيكم ، مالك مابقبت راجل شفتها ولا نهرتها ، وكان لدغتك واحدي صغيري نشوف الجرسة وانا بردان وانا جسمي يهتهت وجيبوا الحكيم وادوني ليمونة وبصلة وكراعي تنبح وكواريك وهضاريب وهي حشرة قدر اصبعك ، وكمان يجي في الحفلة وشايل سيف ويعرض وينطط وانا صاقعة السماء وانا بيهد الصفوف ودخلوها وصقيرا حام ، يا راجل روح بس ، تغش مين انت ؟
نحنا حامين طول الليل نحرسكم واخر الجزاء تفلع برّة داير تكسر ضلعا ، انت ما سمعت بالمراة الدخلت النار في هرًة حبستها لاهي اطعمتها ولا هي تركتها تاكل من خشاش الارض ، ما دا ياهو واحد من خشاش الارض الربنا سلطنا عليهو عشان ينجيكم منو ، انتو قاعد تدونا شنو ! بلا فرتن الكسرة وحتى العضم تكدّوا وتمصّوا المخ الفيهو حتى البياكلو النمل ما تخلّو ، والمركوب دا ، اصبر بس انا اكلم صاحبي جرقاس يختفو ويطيروا في الحلفي ويريحنا منّو ، اصلو حتى هو زهجان منّكم .
نفوت ونهج نخليها ليكم البلد دي !
ونواصل....

عبدالمنعم الفنجري .
[2017/9/13 9:28 م] elfangari9949: *الكوراك والكواريك*
6-
ياربي الخلق دي تكورك مالا ، والكواريك لزومه شنو؟

ذهب كدّوس الى جرقاس يشتكي ويتفاوض لخطف المركوب فوجده زعلان ومنبطح فوق قوز رمله فبادره عوافي يا جرقاس .
جرقاس :- ياخي هي فضّل فيها عافي .
كدّوس :- ياخي انا جيت زعلان وداير اشتكي لك من الزول دا .
جرقاس :- اي سمعت قالوا ضرب برّة فشان قاعد تكورك لي ولادا ، نان ما تكورك ، هو زاتو مرتو تكورك وكمان تدعّي وتناصف ، يصيدك ويصيدك والمرض المايصبحك وماني عافي منّك وكل ما تقول كلمي نحنا نرجف ، اه دا شنو؟ والمركوب بريحك منو .
كدّوس :- يا سلام عليك ، انا عارفك صديق تمام .
جرقاس :- ياخي وين السلامي مع الناس الاتعبت الانبياء والمرسلين ، معقول ما يتعبونا نحنا .
طول اليل ازعاج وسهر ماننوم الا شق الصباح ، الحديد ورور وكمان يسولو كوز واي ، واي ، واااااي ، يعني الناس الصنعوا العربات ديل موعارفين البيضرها من البيصلحا ، هسع الكوز كان انفك وكسر المروحة ولا خرّب المكنة ، بعدين كيف الشورا ؟ قالوا ابتكار ههه ، يا خي روحوا بس ! ابتكار شنو ، بلا سهر وجوع ، حتي الفطايس قلّت بي سبب البياطرة البيعالجوا البهائم وحتي البتموت لحمها بقى مسيخ ومر فشان الدواء والحقن ، وزمان من جنب البيت انت تشبع ، هسع بقى يكدّوا العضم يعدّموهو اللحمي حتى الجزارات بقت ما ترمي شي .
حاجة عجيبة ياخي ! كمان قل الحسبي ، الواحد زعلان من التاني يقولو يا كلب يعني حقر وشتيمي ، وكمان يكاوي رفيقوا ويسمي كلبو ويناديهو جمبو ، الحاسد ، المضر ، البوم ، كي ليهم ، وهو يعني الزول الزعلان منو يعني اخر عدم احترام ، ونحن البندلهم على السارق والمسروقات ونعرف محل يخبو المخدرات ونحرس البيوت والزرايب ومع كدي انا واخوي الحمار واقعين في غضب الله معاهم .
هسع امس القريبي دي...
ونواصل......

عبدالمنعم الفنجري
[2017/9/14 10:23 م] elfangari9949: *الكوراك والكواريك*
7-
ياربي الخلق دي تكورك مالا ، والكواريك لزومه شنو؟

هسع امس القريبي دي الزول جاي رادم القش فوق ضهر اخوي الحمار وراكب كمان من فوق ويهرج مع ولدو وكلمي والتاني ، يا كلب ياحمار ، ونحنا نسمع فيهو ، لاحسبي ولا احترام وانا ان كان في محل الحمار كنت رميتو من فوق الكبري في الحفير ويسالني اقولو كراعي بنشرت ولا بنزيني كمل ولا جيب ميكانيكي يصلح راسي دا ، وان قال انت مجنون ! اقولو اي ، زي ما قلتوا في جن للبقر نحنا كمان عندنا الجن ، لكن صاحبي واحد مسكين وطيب ، ما شاف اخوانو القالوا متوحشين ياكلوا وينططوا ساكت في البراري لا حمل ولا تعب . والغريبة معترفين بي تعبنا واخلاصنا ويقولك فلان حمار شغل وحتى الشاعر قال اوفي من الكلب ، اه دا شنو؟
خلاص نحنا بنهج ونفوت وانتو جيبوا سمع ولا ذئب ولا ضبع عشان يحرسلكم البهائم والبيوت وتصبح الواطه وتشوفوا الفقيع وجرجير المصارين برّا .
ويواصل جرقاس مع ضحكة هههه هاي ، عارف يا كدّوس قالوا سيد امي بي سيدو .
كدّوس مستغرب كيف ؟
جرقاس :- وقالوا الجماعة ديل في بلاد برّا مضوقنهم الشر ، والكلام دا خلو سر بيني وبينك ، ما تشوف الشنط الكبار والهدوم والجلاليب السمحات والمغترب جا والمغترب راح والضبايح والعوازيم كلو بف ، بف وهناك يشتغل اي شئ ومجبور مش حناسة والباقي خلّو .
نان ان كان قبيل خليت رقاد الضل وزرعت واطاتك وربيت بهايمك كان اليدفرك ما يرميك ، شن عاصرك وشن بوديك للهانة والذلة .
ونواصل.....

عبدالمنعم الفنجري
[2017/9/14 11:37 م] elfangari9949: *الكوراك والكواريك*
8-
ياربي الخلق دي تكورك مالا ، والكوريك لزومه شنو؟

سمع الديك باجتماع الجماعة وشكواهم فذهب اليهم ليعرض معاناته مع صاحب المنزل .
قال كلما اذن لاوقات الصلاة ينهرني لامن يقطع قلبي ومرات يفلعني .
كدّوس :- نعل ماهو بالمركوب مع ضحكة من الجميع .
الديك :- المركوب براهو ، ياخي باي شي قدامو ، مرة فلعني بي حقة السعوط .
كدّوس :- مع ضحكة دي كمان عليك بيها يا جرقاس عشان الخرم يعمل عمايلو فيهو .
الديك :- ينهرني ويقول لي مزعج ، نان انت ومرتك طول الليل تشخروا حامننا النوم والبطان قبال الفجاج يجو يكابسوا القفص ويخموا البيض البتفقم فيهو دا والفروج البتضبح فيهو تلقاهو وين ان بقينا هجينا وخليناكم ، وامس عامل حفلة للصباح بي كوريك وصياح ودرز ،درز ، دا ماهو ازعاج .
كدّوس :- انا سمعت قالوا طالعين القمر ، اه امشوا هناك خربوا القمرة عشان ضوها زاتو يروح .
برّه :- ياخي خلهم يروحوا ، عليهم يسهل وعلينا يمهل ، عمرك شفت كديس ضرب مدفع ولا كلب ساق دبابة وحمار اطلق صاروخ ولا واحد من جماعتنا عمل اسلحة دمار شامل يعني الحجر والشجر ونحنا ما فينا واحد ينجو مع اننا ماعند دخل ، هسع شوف الفعايل دي ، ياخي خلهم يحلوا عننا ونرتاح .
جرقاس :- كمان يطمنوا نفسهم قالوا ما في عذاب قبر ، نان البنسمع فيهو دا شنو؟
لب كو اكلت مال الايتام ، لب كو نهبت مال فلان ، لب كو ، قتلت فلان ، لب كو وين الصلاة ،وين الزكاة ، والكواريك تبت ورجعوني ومابسوي تاني ، وين الرجوع تاني دوّر على حاجة تنجيك .
ونحنا اصلا برّا شوية قصاق من المعتدين وينفخونا كدي ونطير هواء وخلاص وانتوا عاد الله يكون في عونكم .

والى لقاء اخر باذن الله .

عبدالمنعم الفنجري .

من مواضيعي :

توقيع :
عمرك المحسوب ساعه ساعه
كله يامغرور سوه طاعه
رد مع اقتباس
 
 
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع

---
شارك هذا الموضوع مع أصدقائك على الفيس بوك
Share

الساعة الآن »02:34 AM.


Powered by vBulletin® Version 2017
.Copyright ©2000 - 2017, Jelsoft Enterprises Ltd
جميع الحقوق محفوظة لمنتديات القرير .Copyright ©2008- المواضيع المكتوبة تعبر عن رأي كاتبيها ولا تعبر عن رأي ادارة منتديات القرير free counters
شركة نوفــ العربية ــل