آخر عناقيد جيل الكبار بالقرير [ الكاتب : عمر محمد نور - آخر الردود : عمر محمد نور - ]       »     حكمــــــــــة اليـــــوم [ الكاتب : احمد عبدالله جقلاب - آخر الردود : احمد عبدالله جقلاب - ]       »     عُــــدنا ***والعـــــود إن شا... [ الكاتب : احمد عبدالله جقلاب - آخر الردود : بابكر محمد أحمد دفع الله - ]       »     المتواجدون [ الكاتب : درماس - آخر الردود : بابكر محمد أحمد دفع الله - ]       »     دفتر الحضور اليومي [ الكاتب : عبد المنعم عبد الرحيم حضيري - آخر الردود : بابكر محمد أحمد دفع الله - ]       »     بريق الوحل [ الكاتب : ابو ميسره - آخر الردود : ابو ميسره - ]       »     اقرأ آية (واحدة) من القرآن الك... [ الكاتب : مجاهد الرفاعى - آخر الردود : يس بابكر الشيخ محمد - ]       »     عبد الوهاب كاره يودع المهندس ا... [ الكاتب : يس بابكر الشيخ محمد - آخر الردود : يس بابكر الشيخ محمد - ]       »     سجلوا دخولكم بالدعاء لي لبني م... [ الكاتب : يس بابكر الشيخ محمد - آخر الردود : يس بابكر الشيخ محمد - ]       »     مـرعـام كأنـه أعـوام !! [ الكاتب : يس بابكر الشيخ محمد - آخر الردود : يس بابكر الشيخ محمد - ]       »     "حــد الريــد" ماتــت ،، و الح... [ الكاتب : يس بابكر الشيخ محمد - آخر الردود : عمر محمد علي ترتوري - ]       »     "سفيرنا بمصر يزور مامان الآن" [ الكاتب : عمر محمد علي ترتوري - آخر الردود : يس بابكر الشيخ محمد - ]       »     في ذمة الله صلاح محمد عثمان [ الكاتب : عبد المنعم عبد الرحيم حضيري - آخر الردود : يس بابكر الشيخ محمد - ]       »     توثيق ندوة حاج الماحي [ الكاتب : محمد يونس - آخر الردود : محمد يونس - ]       »     "عمر ترتورى يكتب : وااا حلالى ... [ الكاتب : عمر محمد علي ترتوري - آخر الردود : عمر محمد علي ترتوري - ]       »     "يااا حليلك يا بلدنا (عمر ترت... [ الكاتب : عمر محمد علي ترتوري - آخر الردود : عمر محمد علي ترتوري - ]       »     اجر وعافية يا ترتوري [ الكاتب : عبد المنعم عبد الرحيم حضيري - آخر الردود : عمر محمد علي ترتوري - ]       »     المختار من خواطر المستشار [ الكاتب : عمر محمد نور - آخر الردود : عمر محمد نور - ]       »     "عمر ترتوري يكتب عن فوز بروف ك... [ الكاتب : عمر محمد علي ترتوري - آخر الردود : عمر محمد علي ترتوري - ]       »     استراحة ما بعد الظهيرة [ الكاتب : أم مؤيد - آخر الردود : ابو ميسره - ]       »    

تسجيل خروج البحث تحكم العضو التسجيل الرئيسية


 
 
العودة   منتديات القـريـر > قــــائمة المنتديــــات > المنتدى الأدبي > مكتبة عبد المنعم محمد توب السوق(الفنجري)
 
 

الإهداءات

إضافة رد
 
أدوات الموضوع انواع عرض الموضوع
 
 
  #1  
قديم 10-08-17, 09:07 AM
عبد المنعم محمد توب السوق غير متواجد حالياً
قريرابي نشط
 





افتراضي حليل الونسي والعمير الراح .

[2017/7/6 5:05 م] elfangari9949: حليل الونسي والعمير الراح .
قدم حسن وحسنين ابناء عمومة واصدقاء لمناسبة زواج ابن اختهم ، وبعد الترحاب بالضيوف ، اتخذ حسنين مكانه في الصف الامامي من كراسي الصيوان وجلس حسن في الصف الخلفي ونادى على حسنين منبها له بان الكراسي الامامية للناس كبار السن وعليه ان يرجع الى جواره ،فدار الحوار التالي .
حسنين :_ يازول هو في اكبر مننا ، انت يا خينا ناسي رقبتك ، هو بلا ود قمريب وحمد الطريفي في اكبر منك وديل يا جو يا ما جو ، اصلو واحد بقى يمشي مباري الحيط والتاني بقى متل فرامة الملوخي ، وينفجر الناس حولهم بالضحك .
حسن :_ يا حسنين ما تهجمنا ، نحن لسع فينا رقشة .
حسنين :_ الرقشة افرقتك فراق فراق الطريفي لي جملو ، يا زول نحن اتعدين السبعين وماشين على التمانين ، انت فشان كل يوم تحفف في دقنك وتصبغ في شنبك قايل نفسك صغير .
حسن :_ يا خي انا هسع جبت عصاتي السمحي ولبست مركوبي النمر ، عشان ادخل الدارة دي واعرض واخجها خج .
حسنين :_ ازول انت داير تعيش في زمان مو زمانك ، انت خلاص زمنك فات وغنايك مات ، يا خوي اعقل قبل ما تجيك فليتي ولا تنزلق تجيبلك عاضري ، انت تقعد جنبي هني وان جاتك هوشة ترفع ايدك في بكانك وان وقفت علي حيلك ما خليت شي .
حسن :_ نان انا كنت حالتي دي داير اخوف الزلال مرتي ، فشان تقول الراجل دا لليلي فيهو عرسة وتخلي الحجي معاي .
حسنين :_ يا خوي انت تاني ما تخوف كديسي واكرس ساكت ، اصلو اعمار الزمن دا بقت ممحوقة والزول يطلق قبال اوانو ، شي هموم وشي مرض وشي فقدان ذاكرة وكمان المرض البقى يجي للناس الصغار يقولولو مرض الشيخوخة المبكرة والزهايمر ولسع تحيا كتير وتشوف كتير ، دا حين يا خوي اعقل فشان ما تعذب الولاد ودوهو المستشفى وجيبهو منها واقفلو بابات الحيشان فشان ابوكم ما يمرق يطش وغطو البير عشان ما يقع فيها وغايتو ياخوي الله يستر . والناس من حولهم مستمتعون ويضحكون واصلو حسنين راجل فكاهي ومحبوب .
حسن :_ يعني نحنا ما بنصل عمر عمي فلان ؟
حسنين :_ وين ازول عمك وعمتك فلاني ديل .......

ونواصل باذن الله .

عبدالمنعم الفنجري
[2017/7/13 11:45 م] elfangari9949: حليل الونسي والعمير الراح .
٢_
يواصل حسنين :_ وين يا زوول ، عمك وعمتك فلاني ديل كان زمنن سمح واكلهن سمح لا فيهو هموم ولا غموم ولا فيهو كيماوي ، حتى طلقانن بعد المية سمح ويتونسو براهم وكل زول فوق عنقريبو . مرة قال لها يا فلاني انتي ساعت مشينا الحج ، دحين متنا هناك ولا جينا ، قالتلو مابعرفو يا الحاج لكن اصبر بطراهو ليك ، وبعد شوي قالتلو جينا يا الحاج ، اي اي جينا ساعت ضبحولنا التور ، قال لها اي اي صدقتي . وتسود فترة من الضحك .
حسن :_ الله يقطع محنك يا حسنين .
حسنين :_ كمان جدك وداعة لاقاهو عمك محمد ماشي ويخب ، قالو يا عمي وين ماشي ، قالو ماشي الحج ، قالو ياعمي انت قايل الحج جمب حرازة الفكي وقادو وداهو لي اهلو .
حسن :_ يا حسنين انت تضحك كدي وتضحك في الناس والشي دا كلو يجيك بعدين وتغلب ولادك .
حسنين :_ الشي دا يجيك انت اللا هسع تصبغ وتتمسح . لامن تقع عليك حكاية ود جاد الله .
حسن :_ كمان حكاية ود جاد الله دي شني ، انت ازول حايم في الاسواق شرق وغرب تلقط في الحكايات دي قاعد تقطعن من راسك . في هذا الاثناء انفجر احد الحاضرين من طرف الصيوان ، ضاحكا ضحك شديد ويبدو انه سمع حكاية ود جادالله من قبل وكان متابعا للحديث بين حسن وحسنين مما لفت نظر الحاضرين للتجمع حول حسنين لان روايته لها طعم خاص .
حسنين :_ قالوا ود جادالله راجل كبر وخرف وجلس في البيت وطول ، بعدين ولادو قالو ابونا دا كل يوم نمرقو في ظل الصباح قدام البيت يغير شوية والطالع والنازل يسلم عليهو . اها ازول زولك نعوش شوية وعويناتو فتحن وبقى يبلحط في الجاي والماشي ، كمان الحريم والبنات يجن بي عندو يردن من البحر ويسلموا عليهو ، صباح الخير يا عمي وصباح الخير ياجدي ، وزولك مبسوط خالص ، بعد شوي بقى يرد ويبلحط ومعاها ما شاء الله ، والله يحسن ويبارك ، وان بقى في ريحة خمرة ولا دخان يكرف الشمة ويشيل ويتنهد والناس تموت من الضحك مع سرد حسنين ، اها ازول يوم جات واحدي سمحي خلاص وسلمت عليهو وقالتلو ان شاء الله طيب يا عمي ، قال لها ماني طيب وانفجر بكي ، وجو ولادو جارين مالك يا با ويجعر ، في شي يوجعك قال لهم لا ، في زول زعلك قال لهم لا ، نوديك المستشفى قال لهم لا لا ، نان مالك ، ويجعر وا مغستي الشديدي ، اها حدثنا بالمغسة دي شني ؟ قال لهم والعبرة سادي حلقو،
البنات ديل متل سماحتن دي وانا متل حالتي دي ايي ايي ، اهو ، اهو . وكان حاضر ود ابكريع ، قال لهم ابوكم دا رجعوهو لي قفصو ، حرم باكر يقع لكم في البحر دا جنبلق . ويرتج الصيوان كله بالضحك .
ونواصل باذن الله....

عبدالمنعم الفنجري
[2017/7/18 12:25 ص] elfangari9949: حليل الونسي والعمير الراح .
٣_
يواصل حسنين في السرد وتمر بهم الحاجة بت زايد وهي امراة لطيفة يحبها الجميع ويحبوا قفشاتها . فينادي عليها حسنين ، يا عمتي بت زايد تعالي فشان نسالك من العرض القدموهو ليك ولاد علي .
بت زايد :_ هوي يا ولد يا حسنين ، انا عارفاك دايرني اتحدث وتقرقر وتضحك الناس علي .
حسنين :_ لا لا فشان ان بقى ما عجبك عرض ولاد علي ، في عروض تاني من ولاد جاد الله .
بت زايد :_ سم امك آ بت زايد انا من تدي لا تدي ؟ لا تشغلني يا ولد ، انا داخلي علي اهل العرس ديل اباختلهم ولا حقي عشاء بهايمي .
حسنين :_ لا لا تعالي بعد ما تباختي وكمان عشاء بهايمك علي انا عندي البرسيم وحسن عندو الورتاب .
تعود بت زايد :_ اها شن عندك آ الممسوخ ؟
حسنين :_ قالوا ولاد علي ادوكي عضم في ساقة البشير فشان تعرسي ابوهم .
بت زايد :_ بعد ضحكة طويلي ،سجم بت زايد البقي يودولا الكراكيب ، انا قت لهم مو عضم ان بقى طين الشيخ ود بشيراغا ، سجمي انا بعودة تاني ، يا وليدي انا من حبس بختي ود الكرف لا يوم الليلي ، عيوني مزغللات وكرعيني مشققات وراسي حفان _ لا ترقدي فوق البرش الاحمر وارقدي فوق البشنتيق الابيض واتوسدي الهدوم القدام وتقبلي علي الحيطة وراء التدي لامن النجمي تطلع ولا تصوبني هدومك واستحمي بي صابون العدي مو الصابون الحلو ولا تشمي الريحي ولاتندهني بالدهن المخلوط بالريحي وكتير ،فشان كدي منافضي العرس تاني . هسع اعرسو الليلي وباكر املى خشم بيتي براطيش وانحبس تاني ؟ كريبتي شني ، يا وليدي ، الحريم المحبوسات هسع ، قاتل الرقبة المحبوس في التمنة مو متلن ، سجمي سجمي ، حال العدو والكافر . والناس متابعين ويضحكون والقادم كله يتحلق حولهم .
حسنين :_ يا عمتي العضم مو شوي اخيرلك .
بيت زايد:_ يخرخر دبرك ، انا اصلي راجي قلب ام قلب ، قالوا بقى ياجروا البكايات والمناحات وحرارات البكي وكل شي بقى بالقرش ، ما حدثت البنيات واضاني طرشي حتى قالوا حفر القبور والدفن بقى بالقروش اه دا مو اخر الزمن ؟ .
حسنين :_ يا ساتر اي والله .
بت زايد :_ كمان الحريم المالات التلفزيون ديل ويسون حق المراة وحقوق الحريم ، حق المراة وحقوق الحريم ، حملتك علي وجناك في الضماني ، باكر دا يكوسن طريقة ياجرن البتقعد تقضي شهور الحد بدلن . ويعلو الضحك ويعم حتى النساء في الداخل يتسمعن حديث بت زايد ويضحكن .
حسن :_ مو بعيد ، اصلو القيامة قربت .
ونواصل باذن الله ....

عبدالمنعم الفنجري
[2017/8/2 8:30 ص] elfangari9949: حليل الونسي والعمير الراح .
٤_
تواصل بت زايد :_ نان يا وليدي ما دامت المرأة سوها وزيرة وسوها رئيسة ، تامر وتنهى في الرجال ، اه دا شنو ؟ مو ياهو قلب ام قلب .
حسنين :_ ديل كتار ، رايك شنو نسويك رئيسة ؟
بت زايد :_ انا هيني ، الكلام البنات الصغار اللا هسع ما قطعن الحمل والولادي ، هسع كدي عديل يقولوا الرئيس حامل والرئيس في النفاسي والرئيس في الحد ، والرجال يختوا ايديهم فوق خشومن ويرجوا الرئيس دا ! سجم البلد وسم وسجم تاني ، حد الله ، برا وبعيد .
حسنين :_ لا لا في النواب يديروا البلد لامن تجي الرئيسة .
بت زايد :_ نان ان بقى النائب زاتو مراة ولا تجي الرئيسة تقولهم السويتوا دا كلو غلط ، اه الحل شنو ؟
حسنين :_ اخير يرسلولها الختم والتوقيع في البيت .
بت زايد :_ نان ان بقت قاعدي ترضع ولا تحمم وتغير لي بطانا يرجوها ؟ اضاني طرشي .
وتاني ينفجر الصيوان بالضحك .
حسنين :_ والله يا عمتي كان يعملوا ليك مقابلة في التلفزيون ويكتبوا كلامك دا في الجرايد .
بت زايد :_ انتو اقعدوا كدي احرسوا الخواجات ديل لامن باكر باكر يقولوا لكم من حقوق المرأة والمساواة ، الراجل زاتو يحد ، اماني يعجبني ليك عجب يا حسنين فشان تخلي الحديث والهزي فوق الناس ، وتاني يعم الضحك .
حسنين :_ الله لا حضرنا الزمن دا .
بت زايد :_ كمان المعرسين اتنيني وتلاتي واربعة ، وكلما تنترم واحدي يقعد في الحد ويبقى من تدي لا تدي .
حسن :_ عفارم عليك يا عمتي والله خوفتي حسنين دا خوفة وغلبتيهو ، اصلو زولا معذب الخلق دي كلها .
حسنين :_ هسع حسن دا جاي محفف الدقن ومصبغ الشنب وشايل العصاي السمحي ولابس مركوب النمر وقال داير ينطط في الدارة ويخجها خج فشان يخوف الزلال مرتو وتقول الزول دا لليلي فيه عرسة ريك شنو ؟ وانا قتلو اهبط وما تجيب لك عاضري وتبدل العصاي دي بي شعبي وسبحي وتعدل التقروقة والابريق وتشوف اخرتك وتعدل قداميتك ، والمركوب كمان تبدلو بي نعال السراميك الجديدي وانتي كمان نجيب لك واحدي .
بت زايد :_ نعال السراميك دي شني كمان ، انت اصلك بلا النصايب والغرايب ما تجيب شي .
ونواصل باذن الله ...

عبدالمنعم الفنجري .
[2017/8/9 5:33 م] elfangari9949: حليل الونسي والعمير الراح .
٥_
تسال باستغراب بت زايد عن نعال السراميك الجاب خبرها حسنين .
حسنين :_ نعال السراميك نعال طلعت جديدي وكعبها متل كرعين الضب في الحيطة تثبت وما تزلق الزول في البيوت السوها كلها سراميك وبلاط ، الواحد بقى يحتار في السفة زاتا يرميها وين !
بت زايد :_ عاقل يا وليدي وكلامك صاح وقادر الله تحي كتير تشوف كتير .
حسن :_ يا زول انت وعمتك دي ، الليلي سويتولي سوات ود البعام وطيرتوا الحفلة من راسي .
بت زايد :_ دا كمان شنو ، الله يقطع محكن يا حسنين .
حسنين :_ ود البعام كان عندو شغل لاحقو ومستعجل وجا الخلوة في فراش حمد علي عشان يتغدى ويروح ، لقى ود عبدالله يوعظ في الناس وهو راجي الغدي بس وبقى يتململ والزول طول في الوعظ وود البعام يتململ وجيعان . غايتو في النهاية جابو الغدي ، اتغدى وقام يلبع في جملو زعلان خلاص ولاحق شغلو ، لاقاهو حيدر في الدرب وقالو يا زول مالك زعلان وعجلان ، قالو اوع تمشي الخلوة ، الليلي الناس جاها دينا داير يكملن كمال .
ويستمر الضحك لما يتميز به حسنين من حبك القصص والمحاكاة .
حسن :_ دا حين انت وعمتك دي جاكم دين ووعظ داير يكملني كمال وكمل فهمي كمان .
حسنين :_ اي يا اخوي الحق رقبتك وخلي الصبغي يومين تلقى دقنك بقت متل الزريعي بيضاء من تحت وبعد شوي تبقى متل دخان العميوقة وبعد داك تشوف الشيب على اصولو ، فشان ما تنسى رقبتك .
حسن :_ والله دي عوجي كبيري ، هسع بقينا لا كدي ؟
حسنين :_ اي اي الساتر الله وقوم علي اهلك من ضو ، وخلي الولاد يودوا الورتابة والبرسيم لي بهائم عمتك بت زايد .
بت زايد :_ اي اي يا كافي البلا و حايد المحن ، ارح ، ارح ، قوموا .
وينفض السامر وسط بهجة وسرور الحاضرين .
والى لقاء اخر باذن الله ..

عبدالمنعم الفنجري .

من مواضيعي :

توقيع :
عمرك المحسوب ساعه ساعه
كله يامغرور سوه طاعه
رد مع اقتباس
 
 
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع

---
شارك هذا الموضوع مع أصدقائك على الفيس بوك
Share

الساعة الآن »04:44 PM.


Powered by vBulletin® Version 2017
.Copyright ©2000 - 2017, Jelsoft Enterprises Ltd
جميع الحقوق محفوظة لمنتديات القرير .Copyright ©2008- المواضيع المكتوبة تعبر عن رأي كاتبيها ولا تعبر عن رأي ادارة منتديات القرير free counters
شركة نوفــ العربية ــل