هاشم سيد احمد عبيد للرفيق الأع... [ الكاتب : مامان ود المدير - آخر الردود : احمد عبدالله جقلاب - ]       »     البدون نشاطات متعددة [ الكاتب : احمد محمد صالح بادي - آخر الردود : احمد محمد صالح بادي - ]       »     العيد زمان [ الكاتب : أم مؤيد - آخر الردود : عمر محمد علي ترتوري - ]       »     أراجيز دعوية رمضانية حلمنتيشية... [ الكاتب : سيف الدين محمد الامين - آخر الردود : سيف الدين محمد الامين - ]       »     ديل السودانيين والسودان .. يـا... [ الكاتب : ود حمرى - آخر الردود : صديق الحسين طه وديدة - ]       »     عبد الحميد عريج الى الرفيق الا... [ الكاتب : عمار حامد على حامد - آخر الردود : سيف الدين محمد الامين - ]       »     السر كشومة إلى رحمة مولاه [ الكاتب : أم مؤيد - آخر الردود : سيف الدين محمد الامين - ]       »     نهنئكم بحلول عيد الفطر المبارك [ الكاتب : ميرغني النقي - آخر الردود : سليمان عبد الله محمد نور - ]       »     عناوين صحف الخرطوم ( يوميا وحص... [ الكاتب : عوض علي حامد - آخر الردود : سليمان عبد الله محمد نور - ]       »     حكمــــــــــة اليـــــوم [ الكاتب : احمد عبدالله جقلاب - آخر الردود : احمد عبدالله جقلاب - ]       »     أبـو القاسم عكود؟؟؟؟؟؟! [ الكاتب : احمد محمد صالح بادي - آخر الردود : احمد محمد صالح بادي - ]       »     تظاهرة ثقافية فى القرير يوم 20... [ الكاتب : بدوى عكود - آخر الردود : بدوى عكود - ]       »     الله يكضب الشينة [ الكاتب : بدوى عكود - آخر الردود : بدوى عكود - ]       »     عيدكم مبارك [ الكاتب : عمر محمد علي ترتوري - آخر الردود : عمر محمد علي ترتوري - ]       »     العــــــــليش ضيفـــــــــاً ... [ الكاتب : عبد المنعم عبد الرحيم حضيري - آخر الردود : عمر محمد علي ترتوري - ]       »     آاااااااااه [ الكاتب : احمد محمد صالح بادي - آخر الردود : احمد محمد صالح بادي - ]       »     نقل زكاة الفطر لخلوة شيخنا الع... [ الكاتب : احمد عبدالله جقلاب - آخر الردود : احمد عبدالله جقلاب - ]       »     النصــــرى ـ فـــنان السودان ا... [ الكاتب : صديق الحسين طه وديدة - آخر الردود : احمد محمد صالح بادي - ]       »     استراحة ما بعد الظهيرة [ الكاتب : أم مؤيد - آخر الردود : أم مؤيد - ]       »     الانتماء للقرير .. وواقعنا ال... [ الكاتب : محمد خليفة حمد محيريق - آخر الردود : أم مؤيد - ]       »    

تسجيل خروج البحث تحكم العضو التسجيل الرئيسية


 
 
العودة   منتديات القـريـر > قــــائمة المنتديــــات > منتدى الشعر والشعراء > منتدى الشعر والشعراء
 
 

الإهداءات
أم مؤيد من الرياض : عيد مبارك عليكم وان شاء الله ترجوه تامين ولامين أمين عبدالله صحباوي من البورت : كل عام وأنتم بخير Q (20) بدوى عكود من القرير : عيد مبارك علينا عليكم كل سنة طيبين طيبين

إضافة رد
 
أدوات الموضوع انواع عرض الموضوع
 
 
  #1  
قديم 20-02-10, 08:11 PM
المقداد على عثمان غير متواجد حالياً
قريرابي نشط
 





Post مكتبة الشاعر محمد سفله

مــنــك لله انــــا زول مـسـكـيــن
وطول عمري مسالم وقلبي حنين
تاتيـتـو هـــواك فـــوق الايـديــن
مـن قبـل صبـاك مـن عهـد الليـن
خـلانـي وطــار ربــا الجنـحـيـن
والخـان الريـد جـد خــان الـديـن
يــا قــاف يــا واو راء ويـاشـيـن
ويا حبي المات فـي مهـدو دفيـن
قـــادر انــســاك وابــعــد لــكــن
مــن بـعـد هـــواك اقـبــل ويـــن
خليتيـنـي وحـيـد بـاكـي حـزيــن
وانا متـا خـلاص راجـي التابيـن
مــنــك لله انــــا زول مـسـكـيــن
ــــــــــــــــــــــــــــــــــــــــــــــــــ ـــــــــــ
عاشقة
عاشق عاشقة عاشقة سواي والعاشقاهو عاشق غيرها
كلنا في الهوي اتلاقينا سايقة خطانا حمي الديرة
نفس اوجاعي حاصله عليها النوح والشجن والغيرة
وفي الليل الصباحو يلاقي عينها تلاقي فد صنقيرة
تبكي تكب دموعها دماها دمعها مابيطفي سعيرها
يارب في مصابي تزيدني لكن في مصابها تجيرها
لوحة من الجمال والروعة ماشافت عيوني نظيرها
الليل شال ضلامو انشر فوق صفحت كتيفها ضفيرها
العين ان حكت بي نظره ابلغ ما يكون تعبيرها
اما وشيها قمرة تلالي شامخه وبي شمخها جديرة
حبها لو تجيبو القوة اليد بي دروبو بصيرة
لو دايري النجم يتلم يبقي عقد فريد في صديرها
كت المستحيل اهديتها لو كان حتي لبن الطيرة
وما كان غيري سهد عينها او فت زول شغل تفكيرها
لكن المشاعر قسمة في الدنيا الغنيها فقيرها
ومن ملكوتو مهما يبقي النفس أبتفوتو مصيرها
قسمتي اعشقها وتاباني لكن برضي ابقي اسيرها
قسمتها يتمكن بي هواها زولا في خيالو اميره
حبيتها وغرق في هواها من يادابا لسة صغيرة
وفوق كل المشاعر الطيبة ليها علي حق الجيرة
مادام غيري مالي حياتها مالي خيالها مالي ضميرها
ببعد وفي الخيال بلقاها واتنسم برايا عبيرها
راضي انا بي ارادة المولي وروحي الهايمة الله دبيرها
مابينسي الرضا وناجاهو مكتوب في الكتاب والسيرة
ببعد من حياتها اّخلا إلا مشاعري في خديرة
لو يمكن تموت في قلبي زمزم يوم بينشف بيرها
ــــــــــــــــــــــــــــــــــــــــــ
جمال بابل
محمد سفله
اشبه ذاتي بي ذاتك لقيتك انا
لقيت نفسي وعشقتك زي تراب وطني
ونقشتك فوق جدار الليل
همسة شوق ملبده في دموع شجني
لما رحلت في عينيك اهازيج غنوة التذكار
وغفرتلك الاسي الجواي
ودبتا علي الوتر غنوه
اتوسد خيالي ونم سمعتك في الدليب والناي
تقوقي ضياعي للرحل شوفتك سالي شوقك سيف
تقطعي من لحم جلدك وتلتقي في جراح قلبي
اتمنيتي زات اللحظه اكون مارد اجيب عرشك
عرش بلقيس واجدد فيك اسطورة عصا موسي
ومالك الجن وامرقك من صدي التاريخ
جمال بابل من قلب الصدف دره
واحاوربك زمن اطرش منو العلمني
منو العلمني اتبسم وقت يصل الحزن حدو
منو العلمني اتشتت شعاع محبوبتي في كل الشوارع زي ضي
منو الخلد نجومو شتي في كل شئ زي النفس لا في المروق
لا في الدخول بنحسبو لكنو في عاين لي زين اشر علي واصل يقول
اقطع كلامو قبل يتم اسوقك امش اخاف اجري اكل
اقعد واقنب بالتعب الهث واتمدد بلا احراج وبي يصل الحذن حدو
والاقيك بي حرف بكاي ...الميس بعيد الليل دخل
دسيني من الظلمه فيك لميني ساعة الهجعه بيك
قبال يسابقنا الزمن ويلحق يكـــتل فينا صفقات الخريف
موعد غناوينا الزمان تصبح خيال يتجادعا الموج
وترسي في وادي الضياع من غير ا نبقي مشردين
ـــــــــــــــــــــــــــــــــــ
نسيتينى

نسيتينى وماقايلك بتنسينى
نسيتينى ونسيتى إنك نسيتينى
سألت عيونك المحتاره لمن إنتى شفتينى
مشبهى والله هاديه النظره أم بهتت عناوينى
هدلتى عجن
رويتى وجن
بنانك فى شفاك طعن أتاريك ماعرفتينى
حرام والله تنسى الماضى ياغرة دواوينى
فاكرك فوق جحيم مشتاقه صابره متين تلاقينى
اتاريك انتى فى وادى
وبنات أفكارى فى وادى
وقليبك طاشى بى غادى ناسى البينو والبينى
إستاهل عشان طاريك لم سهيت عن دينى
فقدت الذات وقلبى المات والله يكضب الشينى
أغنى وماعرفت غناى
هويتك وماحفظتى هواى
وحنانك زى ضايقو سواى ينتح هينو فى هينى
كلكلت المشاعر الباكى موت أحلامه ود عينى
وضمدت الجراح النازفه من أعماق شرايينى
وجيتك برضى انا الولهان
أصدح بى غناوى زمان
ناسى أوجاعى والاحزان وداير إتهنى بى حينى
أمانى بلاك وهم مابيبقه حتى ان كان جرحتينى
تراى صابر أغنى وأدوبى
بغفرلك تعالى وتوبــــــى
رضيت بالجمرة البتبوبى غيرك شن مبكينى
متين ياسفرة الفرح اللحق فى التربه والدينى
ضفافك يارهود الرحمه فوقه يكاكى وزينى
تقيف فينوس على الاهرام تمد ايديها لى قدام
تفرد أحضانه لى الايتام أصافيها وتصافينى
ــــــــــــــــــــــــــــــــــــــــــــــ
مـــــحــــــــمد
محمد فى الغربة تايه حصادو اللمه أوجــاعه
جـداول دمعو البتجرى مغلبى ديمه قراعـــه
ضهب فى لحظة وصولو المدن ماعارف طباعه
وكت سالمه مد إيدو مطنشه مدت كراعـــــه
كتم آهة غلب تكتل صنوف الاها وأنواعــه
وكسح راجع بى خيالو طرا التحنان والوداعه
خرير النيل المتسب سماحة الناس والزراعه
أنين ساقة تنوح مريكبا مفرود شراعا
لقمة لـو حتى بايته تشيله الناس بى قناعــه
وقليلة مكسور خشيمه يسبح ديمه نقاعـــه
حسيس طمبوراً ينقرش نقر فى قعدة رباعـه
وعذاب أماً تلاهيبو وجارى تملى دماعـــــــه
بكا الايام الخوالى وعروض المدن المشاعـه
وجماله المدهون مظاهر تلالى وزايفه خداعه
فجوره وأحلام صباها مجونه وهوسه وضياعه
وتقاليع غلبان يديره واللا يثنى إتباعـــــــــه
أصيل مانعاهو المبادىء يغابى يلم الجماعـه
وينوم ويمحن زمانو ويعيش الغربة فد ساعه
ضعيفاً لامن يسندو نحيلاً ماشى شمــاعـــــــه
وقسم من حالة هزالــو أخير أطفال المجاعــه
صبر فوق الجمر قنب ورويحتو تنازع نزاعه
وبخاف قبال يصد يرجع يكون أسمو غشه الاذاعه
ـــــــــــــــــــــــــــــــــــــــــــ
ياشروق
ياشروق ضاعت عشانك فى المدن مسرة شبابى
وشاله كان تاجر زمانك منى فى لحظات غيابى
أطرى لمن تلقى زاتك قسمى الفرح الجنونى
شيلى فى صفحة حياتك يلا عين الشمس كونى
أما انا الضهبان وحاتك سقدى ما نامن عيونى
كيف انوم واحساسى صاحى وفوقى متحكر عذابى
راح شليليى ومالقيتو ودرو القلب الضلالى
إلا ماأتيقن نسيتو كُستو فى جوف الليالى
الامل نادانى جيتو والفشل واقف قبالى
عاد أواصل واللا أرجع بالشمال شايل كتابى
عمرى ما فجرا مكندك ليل نهار لاسع هجيرو
واتهزم قدمو جندك قلبى واتحدد مصيرو
الا ليه خليتو عندك والله ماأدانى غيرو
ويوم فقدتو انا مامودر كت بى كامل صوابى
جانى ليل الفرقة يقنت سرجو واطيهو العليا
كلما اقول لميتو يفلت ينطلق يبعد حديا
لاقدر قُت ليهو اثبت لاقبلت أروح ضحية
بين زفير نفس المداين ومشنقة زمنى المرابى
فى القلب سطرت حبك بى حروف من نور تضوى
وكست فوق أشواقى قربك والظروف كاتفانى قوى
كم كتير حاولت دربك الا عاد شن دار أسوى
لافى ايدى امسح دموعك لامرادى عليك اشابى
قبرى مالاقيتو تايب قبل اموت داير اغنى
شوقى والخوف والمصايب والامانى البعدو منى
شن دخولى الجنى جايب لو يخيب فى الدنيا ظنى
مالفرح بعدك خرافة مابتعتب غاشى بابى
راكز الصبر المسوس شعبى فى أمية قليبى
ليلى طولو وعرضو اهلوس النجوم تشهد نحيبى
الظروف قدرت تلوس بركت الريد ياحبيبى
ولوعت ريشة غنايا وكسرت سيفى وحرابى
من قواسيبك بجابق سرقه فى عام الرماده
بس أريت أقدر أصابق لم اضوق سيف الابادة
ليهو كاسك مانى طابق لاكمان كايس الهوادة
ولى المحل ياست هوايا شايلو زادك فى جرابى


من مواضيعي :
رد مع اقتباس
 
 
 
 
قديم 20-02-10, 08:17 PM   #2
قريرابي نشط





المقداد على عثمان غير متواجد حالياً

من مواضيعي :
افتراضي رد: مكتبة الشاعر محمد سفله

الضرب فوق الميت
إعدت الجراح ياغالية ما عاد البشوفو جديد
ومابشعر بقيت بالطعنه مهما كان مداها بعيد
واحد عندى كان الامى تنقص واللا تنى تزيد
واللا أصبح ملاقى مأسى واللا يطل على العيد
ماهو غريب عليها الدنيا تقصد قلبى بالتحديد
ودون الناس براى ياحلوة ابقه عدوها انا الويحيد
يانى صريعه من شبيت فوق مهد الطفولة وليد
ولم كبرته واترعرعت فى دنيا الغرام والريد
من نار العذاب الضوقتو لو ماكنت زول صنديد
كان فى قبرى بدرى رقدت فى جوف ود أحدو شهيد
إلا هواك ملانى عزيمه آه يابلبلى الغريد
بلقاك والمحن حابكانى دايماً ليه مادى الليد
الا الليله عاد فى الغربه نازف قلبى دمو صديد
والموت قبل أجيك صدقنى ياهو مصيرى تانى أكيد
الشقى فيها أمسى غرينى والقيد فى خطاى حديد
والشوق بى لهيبو ونارو يلعب فى حشاى عربيد
فى ركن السجون اتباكه أرزح فى الظلام والقيد
وخايف تبقى فيها اقدارى حاكمه على بالتأبيد
لويجدى الشعر ادمنتو كم سطرت فيهو قصيد
وترجمت العليا أغانى لو قول الشعر بيفيد
لو عش فى الجنان يابوحه غيرك ماحأبقى سعيد
ودونك لو هدولى ثماره برضىء أشوفه مره شديد
ــــــــــــــــــــــــــــــ
تمن هواك
محمية القلب النزف دم عمرو من عمق الجراح
وشالك رسالة ريد نبيل محمولة فوق سن الرماح
لميت حروف اشعارى فيك زينتبن صدرك وشاح
دودرت حظى من الظروف سويتو من الخوف سلاح
متحدى سطان الزمن شاقق العتامير والبطاح
سايقنى حسك فى الخيال فوق التعب قلبى استراح
باريت سكة شوقى ليك فارد صبر أيوب جناح
خطواتى مابتعرف تخاف احساسى مابيعرف نواح
رغم التباريح والظلام لازلت عشمان فى الصباح
حتى ان ذئاب محنى القبيل نطن لى فى بطن المراح
حنست أقدارى وبكيت عدن دموع عينيى مزاح
كوركت ورينى ان صبح تعذيبى فى عُرفك مباح
وقفلنى تالا الريح طرش مابيسمعن حتى الصياح
مجبور تساوقنى الظروف شيقيش تقبلنى الرياح
جامحات خيولك جنى ليل لاقنى عن ساعة الرواح
قاعد اذاكر فى الهموم الفيها ماظن لى نجاح
ضاريت فى قلب الوضوح شان انتى مدانى الصراح
كان أشقى كان اسعد معاى قوتيها ياست السماح
لاناسى ذكراك المعاى لابيها لى زول قلبى باح
ولو غيرك اتمنيت مُنى يبقه الغلط عند الله صاح
يابهجت القلب الخد فى دوبو ضرعاتى الكفاح
بدفع شبابى تمن هواك حتى ان لقيتو وراكى راح
ــــــــــــــــــــــــــــــ
صرخه
هيج سكون الليل بكاى قاسم عويناتى السهر
لمن سمع همسة غناى مجرورة فى قلب الوتر
احمينى من جور الزمان يابوحه من إيد القدر
دسينى فى هدب العيون أو بين تصافيف الشعر
خلينى فى جواك كلام أو بسمه فوق أحلى الدرر
واسقينى كاسات الحنان من فم أكاليل الزهر
سوقينى لى دنية هواك نسينى الام السفر
طرينى ياإلهام غناى افراحنا وايامنا الغرر
ورينى كيف الليل يضيع فى ضى تسابيح السحر
وحجينى بالغنوة الزمان قنا فى وجه القمر
حسينى كان مات الكلام أو بهتت ألوان الصور
تارينى غشانى الخيال عجلت راحل ماأنتظر
غتينى شمس الشوق فقع بكانى والدمع انهمر
ابرينى فى النقعه انشويت ابقيلى ضلالة مطر
سامحينى ندمان دار اموت بى همى والادهى وامر
صافينى ياغالية رجاى الماكى من طينة البشر
نص دينى إيمانى العميق بالريده من غيرك كفر
ود عينى لابد فى الدموع واقف تلوت الليل غفر
يعمينى من تالاهو نوم قطع حبال صبرى الحزر
جايينى جاييك لاننوم ساسقته بى فكرى وفتر
سابينى شوقك مت حى بين حاضرى والماضى الاغر
ــــــــــــــــــــــــــــــــ
يونس والحوت

بشوفك فى عيون عنيى وفى جرح القليب النى
وفى جور الاحبة معاى وفى شمت الاعادى على
لأنى وكت سفكت الليل على مذبح هوايا ضحك
والفرح المناى حاحيتو دودرتو وأبلى يرك
لقيت مأساتى تبكى معاى وتضحك فى عيون أهلك
تركت أحلامى للأيام طلقت حباله من إيدى
وقع شقى الشمال كورك لقيت شقى اليمين مشلول
سندت الروح قبل ماتروح وقع منى القليب مكتول
قعدت أغنى ماحديت رغم أنو المصير مجهــول
بكيت مامن وجع وكتين عرفت أنو الطعنى إخى
شرب ريق الصبر شجنى ومحقنى على العليا الخوف
بقيت من الزوال جفال خليك لمن أشوفلى طيوف
انا البلفطرة قلبى رهيف وتلقى على عدوه عطوف
من الشوفتو ياست ريدى ماشفعت عهودك لى
نجومك كان رماها سماها ماأختارت براها تموت
دهج اشعاعه برق الخوف بقاله وحيح غناى تابوت
راجى نجاته من النجا يونس لما بلعو الحوت
سنين الامتحان قضاها حتى نهارو من غير ضى
شيلنى عليك وقوم ياموج محل ماترسى راضى أكون
ولاتهتمى بالمقسوم سمح حكم الله مهما يكون
ضجت فى عيونك كلمة كانت فى قلب ذنون
غناها الزمن لى الدنيا لكن ماغشت إضنــى
ـــــــــــــــــــــــــــ
فرحة حلم

جمبك بشيل من الفرح وأرجم هموم باكر رجم
وساعتى اللفارق طلعتك بالشوق اقرب إتقسم
شابيت وكتين شف خيال مركبنا شابت دار تلم
من نومى صحتنى الدموع تاريها كان فرحة حلم
صنقرت شايل الليا بكا بالعبرة غالبنى النضم
مرات أقشقش فى الموع مرات امصر فى الهدم
لاحن فجرى على بان لامنجحيم الشوق سلم
نفض الصبر من توبو ايدى أوهمنى قبال يتوهم
حلفتك السواك جمال صورة ودواخل منسجم
أدينى أمانك لاأتوه تتنسينى فى درب العلم
انا وانتى جافينا المنام فى عتمة تالتنا النجم
قاعدين نحجى الامنيات الليل نتمو ومانتم
الليلة كيف الحال وراك وانا من حنانك متحرم
لالاقى اتنسم شذاك لاحظى داير يبتسم
والله من شجناً على انا فى ايادى الموت عشم
الروح تسارق ومابتروح والموت يقرب ومابيجم
لو حتى مكتوب لى الضياع وأمالى فيك تبقالى سم
تلقينى عنك مابحيد أو قلبى شان فقدك ندم
بهواك يكفينى وكفاى جواى خيالك مترسم
تقدر تعاندنى الظروف بصبر وحاتك مامهم
ياذاتى ياغنية صباى يابوحه ياست الاسم
البينا اكبر من صلات الريدة والدم واللحم
ــــــــــــــــــــــــــــــــــــ
قلب بالصح
دا ما القلب البجرسو شوق اذا ما اختار سميرو بعاد
ولا القلب التبكي حبيبة لو غابت عن الميعاد
قلب من قام صحاري الالفة كان بيشقهن بالنوق
محكوم بسياج العفه في يوم ما سرح مطلوق
شيال للتقيل ما نحى لو ساد العمر ارقوق
ندي وريان كريم وتجواد إلا من الضعف معتوق
قلبِ نبيل وكلو جمال ومابيحقد علي مخلوق
ومهما جرحو المحبوب وخلا قليبو كلو شقوق
كتوم من قام يضاحك غيرو صابر والجرح مفتوق
عليه ما بيضحكوا الشمات وتجري دموعو روق فوق روق
قلب ما همو يقضي ايامو جنب الضامر المحزوق
قلب مشغول بهم اكبر من اشواق ورضى المعشوق
هم وطنا عشانو نزف دماهو على الارض ماروق
وهم انسان قضايا كتار وما قادر عليها يحوق
قلبي أنا ..
حكيم يعرف متين يرتاح وينسي شقاهو يصفي يروق
ومتين يعكر يكون فيضان ويبقي علي الزرع خازوق
فشكرا ياحبيب الروح على مروادك المطبوق
انا ان حبيت بقدّر زولي وان فارق(ت) بفوت بي ذوق
دة ما القلب البجرسو شوق ..الا بيبكي لما يشوف مابين الخلق في خلوق
ماخده طباعا من الغابه شايله ضميرا ماشي السوق
وتاني بيبكي لما يشوف مابين الحقوق في حقوق
نزلت من سماها زلال وطارت من تحت لفوق
وداعاً يا حبيب الروح .. وداعاً يا ملاذ الروح ..
وداعا وما بقول بنساك .. وداعا والقلب محروق
وداعا وفي الختام دنياك مناي وراي تسوي القوق
تمدلك السعاده ايدينا لي فردوسا ليك تسوق
وداعاً يا حبيب الروح ..
وسيبني اعيش قسمتي وراك باسم والكبد محروق
وقسم بالله .. رغم جراحي لسه عليك قلبي شفوق
وقبال الزمان يفرقنا بوصيك والعتاب ملحوق
بخاف يا من رضيتلي معاك غصب إتمطق العميوق
بكرة تدور عليك الدنيا ومن كاساً سقيتني تضوق
ــــــــــــــــــــــــــــــــ
مدن الضياع

والله يـامــدن الـضـيــاع امــالــي فــيــك مابتـنـحـسـب فـي دوبـا فارقتـا البلـد جيتـك مقاسـي الشـوق غـصـب شديـت رحالـي بـلا ضجيـج خايـف شياطـيـن الجحـيـم جيـت دايـر ابيـع الضـل مـا جابنـي لـيـك شـوقـا قـديـم ضاراني وشك من قفاك ضاريت كمـان واقعـي الاليـم
احـلامـي غــرب شـرقــت شـرقـتـا بـانــت بـالـغـرب
شــان ود غـلابـه وكادحـيـن لاود شـيــوخ لاود عـمــد
مـن قمتـا طاوينـي الشـقـي ومتـعـودي العيـشـي النـكـد
جيت داير اغسل همي فيـك والقالـي فـي جوفـك سنـد
قـايـد شليـلـي ودرتــا انــا تـاريـنـي ضـلـيـت الـــدرب
علمني ليلك كيف اموت واشيـل بـراي نعشـي واحـوام
وكيـف قلبـي يتمـدد تـقـا فــوق الـحـذن كيسـابـو كــوم
والــقــا الـشـقــا شـقـيــش امـــــش الـقــاهــو ويـــــن
مـا بينـي مـا بيـن الهـدوم كايلنـي هـم زايـدنـي خــوف
ســـــــــاوي الــــفـــــؤاد ســـــاحـــــت حــــــــــرب
كيف المصير وانا في وديك تاهـت خطـاي وبـلا دليـل
استسلم ارجي الدار تجي انا عاد ولا اطاوع المستحيل
الرجعـه اقسـي مـن البعـاد اوبيـن ووب هسـي وقبـيـل
اتعوجـن قبلـي ومحـن فـي اوطـانـي عـايـش مغـتـرب
ماسـاتـي يـامـدن الضـيـاع اكـبـر مــن الـحــان الـغـنـا
ميـلادي كـان عــام الـرمـاد الفيـهـو ابـاحـو الغرصـنـا
لاكـت سليمـان يـوم هويـت لا بيـن ايـدي خـاتـم المـنـا
شان اجلبـك باقـي الذمـان او اهـوي بلقيـس ولا احـب
والله يــــــــــــامــــــــــــدن الــــــــضــــــــيـــــــــاع
ـــــــــــــــــــــــــــــــــــــ
منك لله

مــنــك لله انــــا زول مـسـكـيــن
وطول عمري مسالم وقلبي حنين
تاتيـتـو هـــواك فـــوق الايـديــن
مـن قبـل صبـاك مـن عهـد الليـن
خـلانـي وطــار ربــا الجنـحـيـن
والخـان الريـد جـد خــان الـديـن
يــا قــاف يــا واو راء ويـاشـيـن
ويا حبي المات فـي مهـدو دفيـن
قـــادر انــســاك وابــعــد لــكــن
مــن بـعـد هـــواك اقـبــل ويـــن
خليتيـنـي وحـيـد بـاكـي حـزيــن
وانا متـا خـلاص راجـي التابيـن
مــنــك لله انــــا زول مـسـكـيــن
ـــــــــــــــــــــــــــــــــــ
حذارك
حـــــذارك مـــــن تـجـيـبـلــي اعــــــزار حــــــذاراك
قـــلـــيـــبـــك مــــــــــــا بــــــــــــراه اخــــــتـــــــار
بـس باسـف عـلـي الايــام ومـاضـي العـشـره يـاغـدار
منـو الـصـدق غرامـنـا اتـلاشـي قـبـال يشوفـلـو نـهـار
منـو الصـدق قصـور امالنـا تصبـح فـي الحقيقـه دمـار
تصـدقـي لـسـه مــا صـدقـتـا تـايــه والقـلـيـب مـحـتـار
لانــي مـعـاك قـايـل نفـسـي فــي مـامـن مــن الاقــدار
***************
لانــك ياحقيقـتـي الـمـره كنـتـي حـجـاي مــع السـمـار
لانــك فــي غـنـاي مقطـوعـه خـالـده تــرددا الاوتـــار
لاني انا ان بقيت فـي الجنـي غيـرك مـا بدورلـي ثمـار
لانــي انــا مــن عرفـتـك تبـتـا يشـهـد كـاتــب الاوزار
****************
قبـل مـا اعـرف المقـسـوم فرشتـلـك الطـريـق ازهــار
رسمتك بـي مـداد احاسـي لوحـه جميلـه فـي الاشعـار
امـن بغـرامـك وحــدي حـاسـب نفـسـي فــي الابــرار
وتـب لاخنتـا لا ارتديـتـا كـيـف يصـبـح جــزاي الـنـار
**************
انـا المـا بينـي بيـن الدنيـا مـن مــا قمـتـا مكـتـوب تــار
متـعـود تقيلـتـي اشـيـلا قبـلـك كــم عصفـنـي عـصــار
قلبي الكان زمان موهوم وضايع بيـن سجـون واسـوار
خلاص حلحل قيودو معاك وحضر تابين غرامو وطار
************
زي مـا كـت بعـز عينيـك برضـي كمـان كتـوم اسـرار
الاهـواك مهمـا يبقـي تانـي انـا مــا بـكـون لــي مــدار
قـادر احيـا راهـب ريـده امسـت فــي الخـيـال تـزكـار
والا بقـولـك يــا مـغـرور وراك عـجــل الـذمــن دوار
ـــــــــــــــــــــــــــــــــ
إتخاوينا

أتلملمنا كم عتالى وكم سواق كمين عامل حالن ضـاق
كـم إيجـار والسمسـار وجمـر العيشـة وكيـف حـراق
اتلملمنـا مسيحـي ومسلـم واتخاوينـا عـلـى الإطــلاق
لافي سياسة ولا في نفاق لافـي مكابسـه لافـي خنـاق
همنـا واحـد كـان الضـل حزبنـا واحـد هــو الارزاق
كــنــا نـفـتــش عـــــن رقـــــراق لــوفـــي زقـــــاق
قـمـنـا مشـيـنـا مــحــل الــمــوت بـالـعـيـن يـنـشــاف
ويـــــــــوم بـطــعــيــمــو الـــــمـــــر يـــنـــضــــاق
لافـي مـدارس لا اسـواق لا مستشـفـى ولا كافتيـريـا
ولافــــــــــــــي حـــــــدائــــــــق لـــلــــعــــشــــاق
صي في صي الدنيا هجيري وديمه حصاها مولع باق
صن الراس من الصناية وحفا اقدامنا جرى الساسـاق
حتـى الشجـر فـي الخـيـران معـلـم الله مــن الاوراق
كـل الدنيـا حميـر ونيـاق وكـان الحـى افـراق افــراق
ومــا قايلـيـن أقـدارنـا تـحـى بيناتـنـا تـســوى فـــراق
وفـجـأة يــزن فـــي الـقـريـة قـــرار إزالـــة إزالـــة
العـشـوائـي ولا فـــدارى نـحــن بكـيـنـا ولا هـمـاهـو
نـحـن شكـيـنـا ولا هـمـاهـو واحتجـيـنـا ولا هـمـاهـو
فجـأة تكـون القـريـة دمــار واتشـردنـا مــع الحـجـار
اتبهدلـنـا مــع الامـطـار الـفـى كـرقـه والـفـي غـــار
الفي ضـل مضـاري جناهـو والفـى بطنـو مولـع نـار
اتـقـسـمــنــا الـــوجــــع الــــواحــــد واتــشـــردنـــا
عــــلــــى الـــحـــجـــار كـــــــــلاب وصــــغـــــار
بـس ضاقـوا ليشـن ولـيـش سبـقـوا المـطـر والسـيـل
طـفــلا طبيـعـتـو هـبـيـش جــمــرا بـقـالــو عــويــش
بيـتـاً ضــرا الـكـرتـون ضـلــوا الـسـعـف والـخـيـش
واسوبـوا مـجـري السـيـل خلـونـا مــن غـيـر ريــش
يــا رب هــل يمـكـن حـاسـب جـنـاى فـــي الـطـيـش
أم فــي العـطـش والـجـوع والهـمـلـى والطـرطـيـش

  رد مع اقتباس
 
 
 
 
قديم 14-05-10, 09:57 AM   #3
قريرابي ذهبي
 
الصورة الرمزية اسماعيل علي حامد





اسماعيل علي حامد غير متواجد حالياً

من مواضيعي :
افتراضي رد: مكتبة الشاعر محمد سفله

اتمــــــــــــــــــــــــــــــــــــــــــــددى


اتمددى اتسربينى أدخلى من كل المسام
اتوهطينى معاى فى الصحئ فى المنام
واحتكرى فينى الزاد براك واتحكرينى
غـــــرف غــــــــــرف
وتاوقى من جـواى من كل الشبابيك
والشــــــــــــــــــــــــــــــــــــــــــــرف
ح تشوفى ايـه غير عزتك ملكــــه
وقصر محفوف وجودك بالترف
داخل وطن مليــــون ســــــــلام
كل المدن كل القرئ كل الشوارع
زحمه بيك كل الملامح ياها زاتا
اتمددى كونينى بالطول بالعرض
ياكى السماء وياكى المــــــدى
وياكـــــــــــــــــــــــــى الارض
اتسربينى ادخلى من كل المسام
من غير كلف نتجرد الانتى وانا
وانا زأتى اظهر من خلالك دوزنه
زى ازدوجية الشعر واللحن فى
شـــــــــــدو الغنـــــــــــــــــــــاء
اتسربينى عقيده فيك يامؤمنة
وأتعمقى الاعماق و كل الامكنه
وحتى الجدار اطليهو بى انتى
وانــــــــــــــــــــــــــــــــــــــــــا
اتسربينى ادخلى من كل المسام
كل الدخل منك وحاتك مامرق
جوآى اسير واصبحت من شوقك
وكت اتنفسك اكسجينك مابيتأكسد
زفيـــــــــــــــــــــــــــــــــــــر
مأاجملك داخل وطن فيهو كل الناس
رسل شعبك ملأئكـــه وانبيـــــــــــاء
لافيهو آمر لا أمير لاقمرة جهجهت
النجم واتنكرت لى عشها لافى
وشنا ح نلقى يوم شمش الله
صـــــــــــرت وشهـــــــــــــــا
عندك جوازانك تكونينى واكونك
واى فجــــــــــه نخشــــــــــها
من غير خرط من غير حدود
بتحدنا ماانا ونتى فى الاخر
وطـــــــــــن يامؤمنـــــــــــه
ماأنا وانتى فى الآخر انــــا


توقيع :
  رد مع اقتباس
 
 
 
 
قديم 08-10-13, 10:02 AM   #4
قريرابي





فاطنى بت الجزيرى غير متواجد حالياً

من مواضيعي :
افتراضي رد: مكتبة الشاعر محمد سفله

كلامك درر وكل حقائق

  رد مع اقتباس
 
 
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع


الساعة الآن »08:21 AM.


Powered by vBulletin® Version 2014
.Copyright ©2000 - 2014, Jelsoft Enterprises Ltd
جميع الحقوق محفوظة لمنتديات القرير .Copyright ©2008- المواضيع المكتوبة تعبر عن رأي كاتبيها ولا تعبر عن رأي ادارة منتديات القرير free counters
شركة نوفــ العربية ــل