شَخْب الحنين [ الكاتب : ناصر البهدير - آخر الردود : عبد المنعم عبد الرحيم حضيري - ]       »     الليلة يا مسافرين جيبوا لي خبر... [ الكاتب : عبد المنعم عبد الرحيم حضيري - آخر الردود : عبد المنعم عبد الرحيم حضيري - ]       »     نان مشتهيها لـَىْ شِنـُوْ؟! [ الكاتب : احمد محمد صالح بادي - آخر الردود : عبد المنعم عبد الرحيم حضيري - ]       »     ما تفْهَمُوْهَا غَلَطْ [ الكاتب : احمد محمد صالح بادي - آخر الردود : احمد محمد صالح بادي - ]       »     على كرســى القرير الساخن ( عمـ... [ الكاتب : ود حمرى - آخر الردود : عمر محمد علي ترتوري - ]       »     فى رثاء الراحل عبود تبورى [ الكاتب : ميسون البدرى - آخر الردود : اشتياق - ]       »     Nǐ hǎo ma? 你 &#... [ الكاتب : عوض عبدالله طه - آخر الردود : ميرغني النقي - ]       »     القرير بعد الغياب والله مشتاقي... [ الكاتب : أمين عبدالله - آخر الردود : ميرغني النقي - ]       »     ديـْنٌ مـُسْتـَحقْ [ الكاتب : احمد محمد صالح بادي - آخر الردود : احمد محمد صالح بادي - ]       »     الشـــــــيخ الهـــــــــــدي ... [ الكاتب : السر البشير - آخر الردود : احمد محمد صالح بادي - ]       »     بطراااكـ ياقريرنا ... حبكـ في ... [ الكاتب : أمين عبدالله - آخر الردود : أمين عبدالله - ]       »     أرحل ياحمام [ الكاتب : أمين عبدالله - آخر الردود : أمين عبدالله - ]       »     قصاصة من السّحارة [ الكاتب : عمر محمد نور - آخر الردود : عمر محمد نور - ]       »     حديث اليوم .. للمشاركة [ الكاتب : ود حمرى - آخر الردود : ود حمرى - ]       »     حال المسلم إذا كان في إدبار من... [ الكاتب : ود حمرى - آخر الردود : عبد المنعم عبد الرحيم حضيري - ]       »     عناوين صحف الخرطوم ( يوميا وحص... [ الكاتب : عوض علي حامد - آخر الردود : ود حمرى - ]       »     القران الكريم .. يوميــاً .. ص... [ الكاتب : ود حمرى - آخر الردود : ود حمرى - ]       »     احــلى الكلام .. ( من بريـدى )... [ الكاتب : ود حمرى - آخر الردود : ود حمرى - ]       »     اقرأ آية (واحدة) من القرآن الك... [ الكاتب : مجاهد الرفاعى - آخر الردود : ود حمرى - ]       »     تسلم أم شَلاَّخَاً لا ورا [ الكاتب : احمد محمد صالح بادي - آخر الردود : احمد محمد صالح بادي - ]       »    

تسجيل خروج البحث تحكم العضو التسجيل الرئيسية


 
 
العودة   منتديات القـريـر > قــــائمة المنتديــــات > منتدى الشعر والشعراء > مكتبة الشاعر د/ محمد بادي عكود
 
 

الإهداءات

إضافة رد
 
أدوات الموضوع انواع عرض الموضوع
 
 
  #1  
قديم 09-04-10, 01:56 PM
الصورة الرمزية اسماعيل علي حامد
اسماعيل علي حامد غير متواجد حالياً
قريرابي ذهبي
 





افتراضي مكتبة الشاعر ود بادي

مرثية لود بادي
يرثي فيها جده سعيد ود بادي العكودابي

بعد عشرين يابا يوم فوق يوم وعام فوق عام
حنينكم طش فيا طشيش ويا ما لقيت بحر الحنين جمام
اجلببت واتعمعمت واتلفحت شال الشوق احاد الراحله لقدام
كسحت شمال وحس طمبوركم الول وال ونحاس ابواتكم الرزام
صهيلن يصحى فى الشوق اذا ما اتنسم النسام
نزلت قرير اهالى الشام بعشو الضيف بخيلهم فنجرى وعزام
مشيت حفيان على جروفكم ركبت الموج مع وزينكم العوام
كرفت الطينه واسلفان وماكفتنى الا بكت فوق الدار واتبركت من السام
شرقت على رحال القوز واترحمت لحرزن هناك مركوزعلى راسهم
سريع النهمه كان ود توم وكان فى الماضى ما نوام
ردفت الصيحه فوق الصيحه واتحزمت واتكتحت ابكى رجال بكيت فرواتهم
المفروشه للبكاى بعد ما مات حر دت وماتت الخيا م
بكيت سيوف المدروعه فوق الحيطان ذى ما هم رقادن طال رقادن طال
بكيت نحاسم الجل جال وياما قالوا وياما عر با لصهال
مثكل فى الطريح راقدين عليكم الله ياخالدين
عليكم عزة كانت زمن زينكم ودنياكم لبن معسول وتشربوا فيها بهينكم
جدى سعيد ود بادى العكودابى دحين ابواتى كان دفيكم
كان اتربى فى خيلكم ويوم الحاره شائل شيلكم
وقالوا الهيلوا فى العرف هيلكم
بخالطكم بضاعه الخير ويتحزم وقت شيلكم
قالوا اماتو مو دابن حناضل المره شرابن
عقاب التيه ما بهابن ولدن بمشى ديدابن
وشكاراتوا سمعن بى قولى قالن سى سى بزل شكرو
وقالن لى يمين ما قلت فى جدك عشر عشرو
الصهاله والوقاله والرقاله وام غره هو ركابن
الجهميه والقطنيه والمحويه وام درة الباريها حلابن
الشاشايه والتبايه والعشايه وام ضرة لضيوفوا بسخابن
المزروعه والمطلوعه والمفدوعه لبرة متمسح ديمه بساقن
المفزوعه والمقروعه والممنوعه بالمره كان من مافى جيا بن
راكب الفصلو نسابن دائما قدمه فى ركابن
اسو د اغابه غلابن بيعرف يكسر انيابن
حلفوا الشافو قدحوا الجار وشافوا كتار وماهو كضابن
قالوا يساعو مركب زا ن تشيل اطنان وكنشو هلب
جفير سكينو دمو ينز داق برادو اسكت كب
رحل السابله والضيعان خاتمه وعاقبه لقدام وسوى درب
دة ماهو كتير على ولدن مر بى على ضفاف النيل
مشهور بيه دفنو ابواتو صرتو فى مراكب الخيل
ولد فراس وبنت فى اساس ابوه الراتعه ويعبروالكيل
سواقى تسوق تلت الليل ونخلو متنى شائل العجوه والقنديل
عيشو مصوبر ات كيمان وعيش الريف ولد تيمان خاتى البودة والعسيل
شيتن كم دقون شافنو بشفقه وحرص عبدنو والعقال لعابن يسيل
الا سعيد التم بالذائل وختم بماله دارن خالدة كان عزام وباعو طويل
بساطوا الاحمد المحضور غداء وعشيات يلا قى فطور ديمه ضيوفو ديل فوق ديل
يخطف من مطائب الدكه لضيفانو ما ضباح سخيل وحميل
طحاناتو ما نامن جبال اللقمه كم عامن على سمن مصفى تقيل
وكان الارزاق تجى بجاى يمرقا للخلق بجاى وبيتو ملان وتاركو سبيل
يوم الودع الحبان عيونو الغابن تحت التراب
كان الفقد فيه كبير وكان اليوم دة ما خاتن فى الحسبان
كان ميراثو كل ميراثو قدح نازى وسيف فولاذ وفروه ناسو اصال
وعزاز وسبحه ملانا يا حنان ويامنان
قبل ال ال قبل العم قبل الخال بكوا العدام بكوا الايتام وبكت الباديه والعربان
بكى الكرم الصبح مجدوع وكل ابواته غابوا وفاتو الربان
امان الفقد ماهو كبير وياما نحن من بعد غرقنا وتهنا فى الاحزان
صبرن وعشنا لزمن قبل ما يبنو فيه البيت يكوسو الطبله والجنزير مع البيبان
شفنا بشر يشروا لحوم بنى الانسان وشفنا الجزرة المصلوبه فى الصيوان
وشفنا الراجينا برضو كتير ودة المقسوم ويا حليل زمان كان الصاله والصالون
زمان الرقوة والبالون حليل الكان حليل الدانقا والديوان
حليل النافق امواله وتدى يمينه ماتعرف حسابوا شمالو خليك من يعرفو فلان
كل فضيله فى الاجداد ابت ما تبقى فى الاحفاد مسكت فى النعوش الطاهره واندفن مع الجثمان
وكل مكارم العابرين معاهم راقدة فى شبرين
وبقت امجادنا كانو ا زمان وكانوا زمان

من مواضيعي :

توقيع :
رد مع اقتباس
 
 
 
 
قديم 09-04-10, 02:36 PM   #2
قريرابي ذهبي
 
الصورة الرمزية اسماعيل علي حامد





اسماعيل علي حامد غير متواجد حالياً

من مواضيعي :
افتراضي رد: مكتبة الشاعر ود بادي

هوي يا وليد

هوى يا وليد يا دلوعة يا مرنوعة
أعدل إيدك المفدوعةواتلحلح
واقيف دغرى وواس صدرك
مع صدرى واتشدّع

ليك الحق ..........!!!!
شان ولدوك فوق اسفنج
وحتى أول جديد سوهو ليك بالبنج
وهسع هوايتك إنك تلعب البنق بونق
وليك الحق عشان فطموك
بعد مازدتا فوق سنتين
وفى سن عشرة نومك كان على الليدين
غطاك بالشاش وفرشك بيحرير الصين
والبتدورو كلو بتلقى غاب قوسين
ابوك مليان وجيبو سمين وقلبو سمين
وفاتحلك حساب فى البنك والتأمين

وليك الحق...........!!!!!!!!!!
عشان ما خضتا فى وحل المطر والطين
ومن الترعة ما سويت شراب الهين
وما قيلتا فى ضل دومة بى فرعين
وما شاققتا عرق النيل مع الوزين

وليك الحق........!!!!!
عشان ادمنتا عيشة اللين
مشي الاسفلت ما جربتو بالكرعين
ركوب اللورى فى شمساً تصر العين
وما عانيت وقوف الصف وراء التموين
عشان يا انتى ما بتدرى سجل ابواتك البدرى

دحين اسمع .. أقيف واسمع
سماك الباكى مجدو الزال
يا ما كانوا تحتوا رجال
ابوخنجر وابوشوتال
والصقر البجيك خوجال
صوتن كان يمين جلجال
ومكسيين كمال وجلال
لكن الزمن اسرع
سيفن بلحس الفقره
وما كان برضو بالحقرة
وكانوا بضبحوا الشقره
وكانوا بضوقو العادوه نوم الكوع
وكانوا بموتوا فى شان حرمة المفزوع

الجعلى اب شرابا حار وقالوا بعدى يومو خنق
والشايقى البياكل النار وفوقو نحاسو متخنق
ودرفون البجا الصقار وحاقب سيفوا ياكل الشق
والغرباوى عينو شرار وكضب القالوا عندو عرق
والنيلى البعرفوا كتار على كتل الأسود جرّق
والبطحانى والشكرى وغيرهم من أهل فخرى
ومنهم أصلى لا بشبع ولا بقنع

هوى يا وليد
حصل جربتا كب السارية
فى القلعة وخلا العتمور
وشفتا بروقه تترقص وتتحرقص
تقول مطويه فى قرقور
وعاوى الزيفة ينفخ
فى جبال النقعة زى الصور
والحصحاص يجرفوا السيل
يكنسوا على مهاوى الخور
وقلب الصاقعة يتطرقش
يكب النار دمار وشرور
وشفتا الحال عرق مقلوع
جبل متروم فرع مكسور
جمال غرقانة بى حالا
وحد المويه فى الغرغور
ود ابن ادم المسكين
نجاتو تحت قرون التور
والعوتيب يجيك يجرى
يشيلك وانتى ما بتدرى
وما بيرفع

هوى يا وليد ...
حصل سادرتا بالديداب
وقدامك مراحك وراكب الخباب
ودربك طولوا يملا العين
سحاب وغبار ومويتو سراب
وهوى كرباجك البكاى
يبكى على ضهور الضمر الانجاب
وتسرى الليل وما تضوق هجدة
لو كان النجم ما غاب
وبعد أيام تجيك لفته
ويلوحلك فى البوادى سحاب
وتكرف من دعاش العينة تملا رئاك
عطر وأطياب
تلقى الوادى خضر زى تقول
ماكان خراب ويباب
وبت ام ساق تقييل من ضحاها
على المعالى ونسمة الهباب
وتفرش ليك حزمة نال تحت
سيالة تريانة فروعها قراب
وتنفخ كل آهاتك مع المزمار
تصوغ الحان ملانة شباب
وتنسي الدنيا كل الدنيا
ماعندك معاها حساب
خلاف برقا يشيل حرقاص
أو رعدا تقول رصاص وكت فركع

هوى يا وليد ...
حصل صحاك عز الهجعة
صوت شتماً بعيد مخنوق
وجاتك شخرة الطنبارى
مشتاقاً يسوى القوق
ونومك طار واتقسم
والرشرش صبح مفروق
واتلفحت نص من توبك الجرجار
على الدلوكة سايق سوق
وتلقى هناك بنات بلدك ولاد بلدك
يعلو الصفقة تقدح فى القلوب الشوق
ونغم الفال ابشرن يا بنات بالخير
والجنيات تطير لا فوق
وكم زغرودة تتفجر
تفور بالناس بعد ما تروق
يعوم الوز صدورو تشابى
للمجهول وما بتضوق
تميل زينوبة زى البان
يمين وشمال تودى الطوق
واخوان ام شلخ ينكبو جوه الداره
زى صقرا نزل من فوق
ضرب الصوت والركزة بيفرق الناس
عشان زينوبة ما بتحوق
وعاد تتحزم الجنيات
وتتنظم تقيف في روق
وكل واحد يهز ضرعاتو
والحجبات تزح لافوق
جفير الخوسة فايت الكوع
وسيرو مع العضل مطبوق
والطاقية تحت الحاجب المعقود
هدية أم زين وما مشرية من السوق
ويتقدم عريس السمحة رافع صوتو
كان بسوقوا بيهو النوق
والعنجاوى ينزل فوق ضهورن
بس تقول منشحطة فيهو بروق
يبدا مجرو بالترقوة ويتحدر
مع الضلع القصار ملصوق
واحمر عين يشم الدم بعد ما يرش بنات
عمو ويزيدن شوق
وثابت حيطة لا بتهز ولا بتلز
وصارى جبينو كلو عروق
وقال بعد العقد طلقانة ما يحجزوهو
إلا يخلو ضهروا شقوق
هناك الحال مغير جد
وهيجة الناس تفوت الحد
وكان حجازو مد الليد بتسمع كع

هوى يا وليد ...
حصل شارفت دغشا بدرى
فوق حجرة مخانق النيل
فى سنة تساب والشرقي
حزم القيف وطفح الكيل
وشوفتا الهيبة فوق اسيادا
والشخرى البكتل الحيل
وشفتا الجارى يحفر
فى جروف كوكبنا
بس داير يشقو عديل
يجيك بي صدرو متحزم
ومتلقف صفوف فى صفوف
يحاكى الخيل
ومويتو الهايجة تبلع جب
وتجقم فى مدالق السيل
وفوق الرملة مشرور
العشارى طويل
معشعش بين نوايبو الطير
حليلو جزايرو جاها النيل
وحالف ما يخلى شبير
حزم اطرافا يكسر فيها
بالهدام وينحر فيها بالقرقير
وبكرة يموصها يشرب طينها
يزرع فيها شلالات هدير وهدير
وتكسح مركب النواتة عايمى
على قرون الموج جناحها كسير
رواسيها مالى اصابعوا فى المجداف
يقوم لافوق ويجى من تانى فوق الدفة
رافع ايدو ينده فى جملة الصلاح واهل الخير
هناك الموت يمين شافوهو شوف العين
ومافى شفيع ومافى مجير
تقول الزول يعرف اجلو
ومكان موتو لولا إنو
ما كشفو الإله لى غير

شن فضل بلا الغرق البدور ناعى
وفعلا كانوا يا هو مصير
ومشيت المركب الغرقاني بين موجتين
طفروا منها النواتا بطن اللجّة قالوا اخير
تماسيحاً يقالدوا الموج يصارعوا
عتاوة العرق الكتالو مرير
ساعة يعومو بالضرعات وساعة فج
صدورن ضمة مااتبلت ولو قطير
ديل يا وليد ولاد النيل
رضو الهيجة من صدروا
ومن الطيبة رضعوا كتير
الواحد فعايلو كتر ونضمو دقاق
نهرتوا يمين تسوى الفاق
ومراً أصلاً لا ضاقوه لا بنضاق
كفاك يا وليد بلاش فاقة
خلاص أنا تهتا فى الاشواق وما برجع
وهسع ضمة لا شايفك ولا بسمع .


توقيع :
  رد مع اقتباس
 
 
 
 
قديم 09-04-10, 03:49 PM   #3
قريرابي ذهبي
 
الصورة الرمزية اسماعيل علي حامد





اسماعيل علي حامد غير متواجد حالياً

من مواضيعي :
افتراضي رد: مكتبة الشاعر ود بادي

ود الشايقى

يمر الحول وحول بى زول والزول غول
ونحن ضهابة نحن تعابة لا نقدا ولا محصول
يا قشارة ما معقول يا فقاسة ما معقول عليك
الوليه الفنجريه حلاوة نبق
الوليه الغجرية ودايره دق
البطن ديمه منفوخة طبق طبق
ومره تديها الهواده وترمى زى زولين زياده
الله اريتو الزول يزاول يا حكم صفر ده فاول
البطن بت اللذينة عايزة تعمير القبائل
واب شنب تعبان وعرقه يسيل جداول
يلحس الكوع رغم انفه وكان مزاول
شايله فوق الصفحه سوسو واحد الله
باليمين مقيوده سيسى مالو تانى
اب شنب شايل أمانى تلاتة بركه
وكل حركة معاها بركة فى البطن بنجوسها فرفر
والقطر بوراها صفر والله يستر
عينى باردة ومانى حاسد وربنا يتم المقاصد
والله ما شقالو حنكا ضيعو
والله ما سوالو طفلاً ماسقاهو ورضعوا
الا الرباية خشم بيوت والمعايش ماها توت
والمعذب اخير يموت
قد تقولون حراما .. لستُ مفتى …
ولماذا لستُ أفتى ؟!
شيخنا خريج الخلاوى يكتب البخرة ويداوى
يعشق الماحى وطارته وأبوكساوى
قافل اضانو من البلاوى
لا يفهم إلا فى عرّس وطلق
قد يجيب بعض الفتاوى …
حالته ساتره ونص ُكم
بيعه فى سوق السماسره
بيعه رابحه وبيعه خاسره
وهو حامد متشكر ليس ملحد منكر
يمشى ما بين السرارى ونساوينه الحوارى
لا تغيب عن قلبو ابداً
حاجة سعدة لجنة خردة
وهى حاربت فى المهدية
ثم آلت لجلابط وكراضم
عن قريب ستزور الأبدية
ثم تأتى سعدية وهى رهن الخدمات
ومفاخر ومباخر وعيون فاهمات
تعرف الوقت المناسب لتحاسب ..
ليس فى الدين حرج
آخر العنقود ليلى اصغر الزوجات ليلى
شيخنا ودالشايقى افلح اشترى ليلى مكعكع فتصلح
وتصبين وتنحنح وهو شيخ فى هجيع الليل يمدح
يا ليلى ليلك جنى معشوقك أوه وانى
وتجيب المدح ليلى وتغرود غير هدنه
وتزيد الشيخ قرباً قاب قوسين أو ادنى
أنها دنيا المطالب بأسم ليلى من يطالب
فى مره والمرات كثيره
صلى الشيخ الصبح ونافلة بآيات قصيره
وتعوذ ودعا الله بأن لايتجوز
وتشهق وتمنطق وبراس السبحه طق طق
ومضى يتلو الكتاب …
مرّ بالمال والبنون فتبسم وترنم
وبآيات الطلاق فتجشم وتكشم
وإذا مالاقى مثنى وثلاث ورباع
وقف الشيخ طويلا مثل فحل الضباع
وبكى وهو يرخى من حبال وتريه
وجرى دمع الزراعة المطرية
وقال اين منى زوجة بكرا طرية
وقال اين منى المحلبيه ؟ اين منى السرتيه ؟
فى نقاء كبحيرة طبرية
ودعا الله عروسة ….
خطفها خطفها جاب ضحية هايله ومذهله
وتفوت سنه وتمر سنه وشيخنا عجّز وانتنى
شيخنا يا شيخ السجم خلف زرازير البجم
واحدين اساميهم عرب واحدين اساميهم عجم
بدأ بسيد الخلق ثم زوجات الرسول العشرة
وكل الذين تجمهروا فى البيعة تحت الشجرة
طلحة الخير والزبير ثم سعد وسعيد
ثم ستة مبايعين ثم عبد مايشاء من البنين
عبد الجليل عبدالرحيم عبدالمعين
وتنوع فى القوافى وفى تراكيب المضافى
شمس الدين قوس الدين
ولهب الدين وقمر صناعى الدين
أخر الدور تقول مسحور
وما بخليلو مرةً بور
وزراعته ما بتقع واطه
بقت الطلبات بالدست
حتو درج الخزنة حت
الوليه تنبح كان أصبحت
وان كان مست
خرائط ولفايف ومحزق ومنمق
أنها نكبة روما والمتمه
إن طعم العرس حلو ولذيذ
وهو كاسات افراح ونبيذ
ثم تأتى انتفاخات القرنتى
وباعوض كالنتمتى
لا يقاوم بالدي أم تي
حنى حنى … وتتى تتى … ولا عليا .
_________________

  رد مع اقتباس
 
 
 
 
قديم 10-04-10, 02:01 AM   #4
قريرابي ذهبي
 
الصورة الرمزية اسماعيل علي حامد





اسماعيل علي حامد غير متواجد حالياً

من مواضيعي :
افتراضي رد: مكتبة الشاعر ود بادي

حـــواء


كابى المقنع الجرجار على موية الوجه يا حوا كابيه
وزازى الدمعة منك بى طريف التوب
احزمى حشاك واكربيه
خيراًً ولى مو مدخور ،
رزق الليلة داب الليلة
والباكر تشابى وما بتجيبيه
ويا حوا الوكت مرواح وزمنك راح
امسكى ضرع شويهاتك احلبيه
ليش ماك حامدة ليشن جاحدة
والرزق العليك هطال شربتى التانى فوق بكريه
محمود الغنى ومشكور
غيارك فردة من نسج الكمالى
والتانى توب جاراته بنغالى
ومحمود الغنى ومشكور
وعاجك فضة من دق وتبيد الغالى
ومحمود الغنى ومشكور
نارك موقدة ما عونك ملان مو خالى
ومحمود الغنى ومشكور
وابوزينوبة ناهض فيها ماهو الخملة عنقالى
ومحمود الغنى ومشكور
وأحمد قلتى نور عينيك مختَر
فوق بطان الحلة خوجالى
عصاية الصبينة المكسية بى جلد
الندف والخامة سرهيته
وسرج المرقة سنارى ومسمَر
فوق سراة البانى سنكيتا
وجزلانا مجنزر وطية رزماً
من بطون الطينة مبحوته
ولازم الفنجرة اتبشقت سبع خمسات تصل
حاكت حجول المارقة من بيتا
ومتلفح كساوى الساكوبيس
صوبان وظهرة تقيلة تبرق سنو سوميته
جيداً جيت وجيدلك
حوا بى جنس الجنا القارى
وجيدلك حوا بالولد البعوم الشبكة سدارى
متلك حقو لا تنضامى لا تنلامى لا تتضارى
وانت ولدت للبلد البجيب راس العشارى
عدلك هادو فى كُم الرجال أحمد يمين مقنع ولايا
وفى دارة البنات زينوبة فرقت
منهن فرقة كتيفها من الفداية
عصارى الوردة فوق المشرع
اب مسكا دفق روسن وقايا
وسون قدلة الوز الرطن
صباحى شاقات اب شراية
تبين زينوبة حين تتوقى شعراً كاب
بعد ما انساب على الخد المرايا
عصارى الفزعة والفازعات يجن بكراً تنايا
ويات من تبقى حازمة
التوب على النص القناية
تبين زينوبة حين تتحزم الخصل الشرابهن
صندل الناس الغنايا

شن معنى الكسوف يا حوا
والحزن البجيب ليك الشماتة
وكنزك فى الكنوز زينوبة وأحمد
كل يوم زايدين قيراطين فوق تلاتة
نجوم السعد فوق حجرك تباسم
وانت شارفة ترمى فى ودع البخاته
شتول الفرحة تتفتح قبال
تتمد ليك الليد ومالاقية التفاتة
اقطعى الزند البقودك
من فلاة الخير على بلد الدراهم
واقلبى الطوف إن كسح بك
من جروف الخير على جزر المراهم

يا ديار حوا المراقدك فى رويس عبدلّه وينك
يا المشاوير المشيتك يا المشارع السالكة وينك
بالى فيكى إلا درب العيشة باعد بينى بينك
يا لبينة المغربية النازلة من أطراف سعينك
يا السرابة الحبلى كل الناس تعاين لى جنينك
يا السبايك الساوى شيلك
ولا طويرة الجنة تسكر من مدينك
يا السواقى النايحة زيك
زى حنان اماتنا فى حرقة حنينك
يا بنية طرية طامرة كنوزا بى طرف الطريحة
يا نسيمة رشة باردة تجينى
ساعة اشيّلك موية الصفيحة
يا مليحة
. يا العقيد النام موسد راسه حبات السبيحه
يا صباح الرحمة يا الروح
البتلفى حوارها تمرق من ضريحها
يا حزيمات القمح منشرة فى زمن الحصاد
يا رياح الشتوى هابة على مساجين
المشال بالفرحة والفرج القريب
يا نزيل قمر التمام الحشو
فى شيلتو السناجك والارابيب

يا ولد نقرات تقيك الفى الحصاد
عاقباها بعد المسرة نقرات الدليب .

  رد مع اقتباس
 
 
 
 
قديم 10-04-10, 02:05 AM   #5
قريرابي ذهبي
 
الصورة الرمزية اسماعيل علي حامد





اسماعيل علي حامد غير متواجد حالياً

من مواضيعي :
افتراضي رد: مكتبة الشاعر ود بادي

عـودة الـدراويـش

حال هذا البلد بكانى ما سكتنى
ريدتن فيهو كيف مالكانى كيف ملكتنى
نارن فيهو كيف ماكلانى كيف لهبتنى
الاّ ترانى فى العرضة انحسب برانى
والناس البتعرض جوه مما سمعتنى
الاّ ترانى انبح زيي زى إخوانى
والخيل بى عجاجة عمتنى
توبى قصير وما غطانى
والزيف ام برد شقتنى
قلت اباصر امرق بره من احزانى
وين قبلتا سفكت دمى وإتعدتنى
ولا زينوبة آخرت إيدى فى الدنيا أم بناين هش
من شافتنى جفلت منى خنست فى نوايا القش
مرادى سلاما يغسل حزنى
الاّ سلاما زاد احزانى زادنى عطش
لحقتها فى الفريق اتناسا وانشد حالا
طلبتها شاى وقست مداسا
قصرت عينى فوق خلخالا
لفحت توبا لحقت ناسا
وقفت غادى عدلت حالا
غزت كوعه هزت راسا
لفت جيدا قالت لا لا
قالت لى شن معناك وشن كسب الرجاك ورجاك
وشنو الراجنو من تالاك
زمنك كلو تاكل باردة ماضق شر
زمنك كلو نحن نعوم وانت تغنى ماسك البر
وزمنك كلو فوق الفارغة فوق ريح المدن منجر
الخير إن مرق من دارنا لا انحسيت ولا نحاس القبيلة نقر
ولينا سنين خلانا سموم وما شربت حفايرو مطر
منيحه الشافع الاماتو راحن فى شموس الحر
صقور الباشا نهشن من ضروعا وفوقنا طارن فر
كلاب الباشا فطرن فيها وما لقن البيقول لها جر
والباشا الغشيم فى ذاتو قعقع ومن كبادا فطر
لا ولدن يقولو انتر ولا مهيرتن تقولو فشر
ويا الباشا الغشيم قول لى جدادك كر

بعد حكت العليها اتوهدت برزن بروق عينيها
كست خلاصى بين إيديها ما لقيت البلفقوا ليها
وقعت دمعة من ود عينى قلت اخفيها
وقعت عينى ذاتها عليها
حسبت المسافة البينا قلت امشيها
كفتنى الصقور بي جيها والبلد اترمت بي جيها
حكموا كتافى عقدوا لسانى ضاروا وشيها
غنوا اتهنوا تربوا وشربوا من بكريها
مصرو ثديها شربوا سلاف معتق من لذيذ شفتيها
عينى تشوف لسانا وصرختا وثكليها
عبلة تنادى فى الولد البشق التيه
عبلة تنادى فى الولد البعرف الجيها
عبلة تنادى فى الولد البعدلو وشيها
عبلة تنادى واقفة قصادى مصروا ثديها
عينى تشوف لسانا وصرختها وثكليها

هيا ريح الصلاح هبى
وامرقى من متاريسك
من طرف البلد شدى
وسوى البرجى داك ميسك
بارده علينا تنكبى
ودمنا زيت فوانيسك
هو لا شرقى ولا غربى
بينزف من دراويشك

والليلة يا ريح الصلاح الهابا فيك راحه وجع
والليلة الشجر الكبار وحشاه ناقرو السوس بقع
والليلة حق الناس ببين والليلة بنشوف البدع
والليلة وين البرقى من تالاك يبين
والبرق من تالاك سنين
يبرق كذا سيوف الصحابه الساجدين
والعاديات المؤريات خرشه جنات فى الارض جات
والخلوق الضايقة لا قوها اجمعين
عرب البوادى المن شرق والامه دى المصلوبه
فوق حبل الصبر لما اتمدت والكادحين
والصالحين والساجدين والعابدين والزاهدين
ونفضنا من زمن الجدود صقر السنين
وسرجنا خيل مسروجة من زمن الحسين
وعرضنا زين
وجمعنا غطا المشرقين والمغربين
واميرنا صاح الرايه وين
والجمع صاح الرايه وين
ومشينا بالتاريخ ركبنا على البساط الأحمدى
كايسين محل وقعت سوارى الرايه
وانقطعت تواريخ النعوش
ولقينا باقى الرايه فوق قبر الخليفة الراشدى
مليانه دماً كيف ندى
وساريها فوق الفتنة دايخ ومنتكى
وغسلنا بى دمع الندم قميص عثمان من الدم الزكى
وعقدنا حبل الدين على طرف القميص المكملى
والراية زادت من الملى ورفرف قماشا المخملى
وحرسوها زى سبعين ولى
ما جلهم حراس الهنا ما جل حراس الأمانة وديدنا
يات من حوار ختم الكتاب ختم السند والعنعنا
يات من ولى ودرويش غرق فى الهمهمات والدندنا
آن الاوان والخير دنا
اتحزموا السبح الطوال واللوح برق
ارجونا فوق طرف الجبل مشهادنا نفزع مجدنا
ايد فى لجام الخيل تقل والتانية فى لجام النفوس
المادحه فى درك الزمن
يا امه كسلى ونائمة فى تياب الكسل
وهواها ماشى مع الأضل
الخيل مصوبر فى محل والخيل تجقلب فى محل
بعد العدل والريح صلاح والظلم راح والصاح قدل
بعد الشروق يا امة وسطا بتشهد فى الخلوق
بعد الشروق نجمك أفل نعشك غشانا على عجل
يا امة وافاها الاجل وماتت على سوء الختام
واخر الكلام فى لسانا كان هبلاً .. هبل
هبلاً .. هبل
وسقط هبل .

  رد مع اقتباس
 
 
 
 
قديم 10-04-10, 03:40 AM   #6
قريرابي ذهبي
 
الصورة الرمزية اسماعيل علي حامد





اسماعيل علي حامد غير متواجد حالياً

من مواضيعي :
افتراضي رد: مكتبة الشاعر ود بادي

جزيرة عِـبد إلًه

أنا أخو البت اللكعت قرن الخمرة النازة
على وردان الصبوة الراكزة
الجنيات الهازة ..
صدورن لازة
ورقّ النص زي خيت الشلة
بالحيل آ جني إيه والله

الجنيات الحزمو الجبة
وعرق الشتوي عليهم نايا و صب
قول ما دلّه .. رجالا حصدوا الحبة
عيشهن هادو انكال واتعبّ
ومنو كتير في الواطا انكبّ
وباقيه مصوبر واقف قبة
الحمد آلاف .. الشكر آلاف
الحمد آلاف الشكر آلاف
العيش الرقد أصناف أصناف
الولد الكال.. عزام .. حلاف...ضياف
الرزق الجانا مدلة..
الحلق الجاف اتبلة
بالحيل آ جني إيه والله

الوادي الجانا مترقن
مدّ جنحاتو الطايل شرقا وغرباً
القبلي بروقو على القلعات يضّربن
الدُّكَن البعدن قربن
فوق صنقور المحلة الطالت كبن
قول للمحلة بيوتك خربن
قول ما دله.. الحلق الجاف اتبلّ
بالحيل آ جني إيه والله

مرحاتنا شرابهن يوت ماغبن
شبعانات .. في الشقل أب شوك ما شبن
الحُمّل ولدن وربّن
حلماتن تقلن.. جرّن.. فوق سيقانن كبّن
اللبن العايم في ضرعاتن جبّن
المغصة إن كان ضرعاتن خربن
القرعة آ وليد .. السعن آ بنية
القربة كمان... كبوها المية
المغصة إن كان ضرعاتن خربن
شوفو النعمة السالت فوق قيزان الرملة
ناس البندر لبن الشاي بالعملة

سمح الخمج الفوق أسيادو
سمح العز المن أجدادو
الجنيات المشو ما عادو
كان بالردة أكان اتنادو



سمح الخمج الفوق أسيادو
سمح العز المن أجدادو
الجنيات المشو ما عادو
كان بالردة أكان اتنادو

غرّب حامد وشرّق بلة
كانوا بحلبو الضرع الدلة
كانوا بحضرو الخير القدحو معلا
الجنيات ما كفرت بنعمة الله
بالحيل آ جني إيه والله

ذات في يوم والغيمة تهتّف مطرا نقّع
فوق نوار الطلح الفقع
ريحة البرد إن جاتك عطرا فايت خمر الفوق أردافا مجضع
شفنا الوادي يقشقش في دمعات الليل
والتعل الشايل بدا يتفقع

تلب حامد فوق مخلوفة أب زور واتربع
طلق الرسن أب زمة وسوّا خبيبا بدّع
هوّد في رقّاب الصي
لا قوه ثلاثة زبيدية
خالفين سيقانن فوق السنكيت ورقاب ألبل بيناتن مرخية
محجوبات بالخرز الفصلو السوميت
كل واحد درقة وسيف وطبنجية
وباقي جرابن مليان دلميت
الجنيات اتقبلو وضاقو الحارة وضاقو المرة
وكان حجازن صقر الجو
حامد كان عارفين .. ضاقوه رجال قبالكن
شوفو أرزاقكم أخير من ضو
حامد عوج الطندب آ وليدات
عوج الطندب نار القصب الهبلت ما بتعدلو
شوفو شلوخو تلاتة مطارق رقدن
وكل تلاتة يمين سياف اتقبلو
حبوب القارح ... ما دلة
ولدا ما ختالن زلة
شن قولك فيهو عليك الله
بالحيل آ جني إيه والله
وينا مراتع الدرت الباسط دايما ببكي عليهن
وين بنوت الحلة البكّر عصرا بدري يسون في شاهيهن
بعد الليل ما يهّود ونحن نهّود..
عاد أماتن ينادن ليهن
نمشي على القيزان نتقادم
أقيس الخطوة مع التاتاي ومشيهن
والله البعد الحاصل ما نساني
وحاتكن في قمراتنا بشوفو وشيهن
الا النضم أب غنة اللهج السكر وين بلقاهو
بنات الريل الدوب ليهن
الخوف يا ناس كان يبقى الشوق الحاصل بينا معشعش فيهن
مقنع سابل وين بلقاهو
طرفا ذابل وين بلقاهو
وعين بتدنقر من واليهن

الوجنات الشعّن بقّن
ود العين النايم زرقن
مو زايغ رسيان وميقّن
زولن كان خدران ومحقّن
من الشوفة عروقو يطقّن
كان الدنيا بصح تتخلا
كنا بركنا معاهن فوق رملاة الحلة
الا كمان بنشوفا مذلة

الجنيات الغابت جابت
إنت الجيب بس قايلو قميص افرنجي وكرتونات كرملّة
لا لا وحاتك حاشا وكلا
ديل يوم عادوا اتلافو الجاهل بحقوق الله
ديل كم لحقو البشهق ضايق وداووا العلة
الولد الجايب حقايب سفرو تقال..
تقال من جنس كتاب ومجلة
الحكمة النضم إياهو الكان..
الحكمة الولد اتوضى وصلّى
عادة البلد الدخلت فيهم سكنت ..
سكنت ماب تتخلا
نحن كما طارين الحلة ودرنا الطلة
نشيلا معاهم فرح وميتة
حلاة الموت كان في عِبدلّه
حلاة الموت كان في عِبدلّه

  رد مع اقتباس
 
 
 
 
قديم 10-04-10, 01:06 PM   #7
قريرابي ذهبي
 
الصورة الرمزية اسماعيل علي حامد





اسماعيل علي حامد غير متواجد حالياً

من مواضيعي :
افتراضي رد: مكتبة الشاعر ود بادي

الرســـــالة


بت الخير يجيك الخير
وصل جوايك الكاتباهو للولد الحتالي
وكان الظن ترسلي ليه هين هينين من البركاوي
داك الطعمو حالي
ولو بالقل شخاليب دوم
وهنا والله ني ومسيخ وغالي
سؤالك يمة عن احوالي
كان شفتيها تغنيك عن سؤالي
انا اتوكرت في قلب البنادر
زي غريب شرقان مدلدل في الدوالي
جات شايلاني حرّة جوف
انا اتحديت مجالا مومجالي
مصايب الجامعة اكبر من جميع الشفتو
ولا سمعتو في ايام الخوالي
قعاد الكرسي كان شفتيهو
ورم ساقي زي سيد الزلالي
اقلب في الدفاتر من صباحا بدري
لامن تمسي ما بنسي انشغالي
اسوق الليل تحت ضوء الكهارب
وديمة هارب من فراشي
وهادو حالي
ده كلو عشان اجيب نمرا
انافس بيها واستر بيها حالي
والله عاد حالة ما بتسر البال
ومن يوم ما هديت ما انسر بالي
سلاطين العلم يايمة
ينسوا العشرة في فد يوم
يدفروك بره زي دفر الطبالي
وخايف من اجيك مرفود
وهادي الفكرة من ما جيت
معشعشه في خيالي
واخير افتح اضانك
قبل ما تلقي فوق اضني
ملويات حبالي
وكان حصل القدر يايمة لا تلوموني
لومي علي البنادر نورا اقوي من احتمالي
بناتا فيها رويانات جسومن بالدهون
تلصف بلا جلود السحالي
سبيبن ديمة بالحزم الكبار مبهول مردم
فوق قفاهن..وا حلالي
صدورن طامحة زي موية الدميري
الهايجي تكشح في العوالي
عيونن واسعة تبلع مية
زي ولدك تشرك للموحد والضلالي
وحاتك ضُمّه ما بقدر عليهن
ساعة اقيف قدامن
انكس راسي بي قدري وجلالي
مشيهن سوا زي سرب الغزال
لكن نفورن مو غزالي
عدادن مابخبرو
الا وين ما امشي الاقاهن قبالي
وقصاصن ينقّر بي عصاتو
ومايفرّق دربهن
من بين دريبات القماري
بخورن في سماء البندر
يدوخ متل مسك العشاري
رقيصن ينهزنو بلا الفلو
الّلماتو غابن منو في ضل الضهاري
يجمّع في قفاهو وينطرح
يتمطّى تتحتحت مفاصلو
وده ياهو الفاك جباري
دلالكين تجيب الضلّ
علي متاهات الضهاري
غناين اصلو ما سمعنابو
كنت بقول ليكي الا هسع ما ني طاري
وطنبورن مبرقع وحسو فاقع
لا في كنتر لا ودع فوقو بيراري
عشوقن في الرقيص
يتلوي متل سيد المغص
يوم يبقي في حالة طوارئ
والمداين ديمة فايري
زي وحوشا في البراري
والمـآسي كتيرة حاصلة
والمكضب يلاقي بوليس السواري
عاد دي حالتا بقدر اتستر معاها
خلاف احاكي الناس واجاري؟
وانتو راجيني يوم اجيكم بشهادتي
وينبسط ضهري وكباري
وبرضو خايفين من اجيكم بي غربية
وفي خجل قايد صغاري
والقدر بي غادي كاتب ليه شيتا
لاني حاري ولا ني طاري

حاجة واحدة تكون في علمك
اني جايي وتاني راجع لي دياري
وياني حمّيد القديم
الا بس فاقد حجابي وراح سواري
يمة كتري من رضاكي
وسلميلي علي المعاكي
وقولي لي حبوبة زيك
نحن شبنا وماك براكي
سلميلي علي جروفنا وحتى وزينا البكاكي
سلميلي علي بناتنا
وقولي ليهن ماني ناسي
طاري شلاخا مواسي
زي شقوق بيتاً سداسي
طاري نقشا فوق خدودن
بين ضفايرو وشوفو قاسي
جسمي في البندر ممدد الا بينكم بي حواسي
سلميلي علي البكادن والبشتت في التقاوي
في الكرد محراتو قالع
وصوتو فوق تيرانو عاوي
ماحزم بقجة ثيابو وقام فجر لاحق اللواري
اخيرو يحفر في جروفو
مالو مال حفر المجاري
سلميلي علي الضرايح
والفضل من الخلاوي
والفقير الفوق حصبرو
يكتب البخرة ويداوي
مع السلامة ودعتك الله
ولي وصيتك ماني ناسي
لي شفقتك مافي داعي
وابقي عشرة الراعي واعي
في بحور اهل البنادر من زمن طالق شراعي
كان نحجت بجيك غانم
وكان فشلت بجيك ضراعي

  رد مع اقتباس
 
 
 
 
قديم 17-04-10, 11:31 AM   #8
قريرابي ذهبي
 
الصورة الرمزية محمد سليمان كارة





محمد سليمان كارة غير متواجد حالياً

من مواضيعي :
افتراضي رد: مكتبة الشاعر ود بادي

سياحة فى حى العمارات
يا سكان القصر العالي سلام
يا سادات البرج العاجي سلام
ها نويسات البلد الغادي سلام
تبقى مصيبة إن كان السُنة
إنعدمت بين الناس
تبقى مصيبة إن كان
القرش الأحمر قسم الخلق
أجناس أجناس
يا ماليين الكأس من دم الخلق
الشربت عرق الفأس
يا الشرف البدري إنداس
والبلد الظالم شالكم فوق الرأس
أدواركم طعنت كبد السحب البكايات
وقار الليل سالباهُ كهارب الهجعة الضوايات
قايمين الليل الكأس مليان
الجوف مليان
اللحم الطازج راقد بالعينات
وغفيركم نوم نجم القبلة
أم رأس قوي
وجنبو كلابو الهوايات
يا سادات البذخ الباذخ
يا بعض كروش مليانة فتات
يا نجس الأرض المدعية
يا نسل الأمم المدعيات
ماعون الويسكي الأحمر
علب البيرة الصايدر
مصو الخبث الراكد فيهن
سماً يعشرق ونحنا أدونا الفاضي هدية
يقعد في شمس الله تلات أيام
بطهر منو السيئة
نسلخ منو الدمغة الوصفت عينتو والكمية
تمشي أم أحمد تغسل بطنو وضهرو
ما لازماها وصية
بعضاً ينفع دلو نشال
في بير أم تسعة رجال
تقدل بو بنيتاً سمحة مع الشهلال
تسقينا حلال وذلال
الفاضي الكان مليان أحزان
وأطرافو تسيل
أتحول كوب معقود فوق قلة
تنقع وراقدة سبيل
وسبيل مسروف مكتوف بمحاية
علي سيالة وراقدة ضليل
الغاشي الماشي الراحل
ونوّخ دابو ودلّا الشيل
الطير الطاير فوق بلداتنا
وناوي رحيل
الولد السادر فوق مشهاد
البرق الشايل
ودربو طويل
وعموم الناس
الفرع الصايدو يباس
وكلاب الحر وبنات الريل
بتشيل بتبل الريق
الموية نواحي السافل موية نيل

**********************************
يا سكان القصر العالي سلام
يا سادات البرج العاجي سلام
ها نويسات البلد الغادي سلام
أدوني سلام
وإن جيتكم تاني ملام
والله إن كان عارفني تمام
قدامكم وما شايفكم
وساعة أشوفكم أشوف قدامي أقزام
أما سوافل تبنو عوالي تناطح الغيم الراحل
راحل تالا السافل
دور فوق دور وحدايق سور
وتلاتة مداخل باب مفتوح في باب
مقرون في باب
دهليز ومجاهل
القرش الأحمر صايل حاكم بينكم تارك وفاعل
اللقمة بتوصل حلقك بالإيجار
الريش بتقصقص تحتك بالإيجار
وحرير يتماوج فوقك بالإيجار
لكن الموت الموت إن جاكم طرفة عين
بتأجروا مين ؟؟؟
كان الموت بالأجرة يفوت بتأجرو زول
على شانكم يموت
لكن الموت مرسال جبار وعنيد
أعذار الناس ... أعمار الناس
أموال الناس ... وعظمة الناس
في إيد ... والموت في إيد
أرقدوا عوافي ونوموا عوافي
فوق الفوق لا حر ... لا سموم ... لا سوافي
الإيد الطايلة تجيب المافي
خزائن الأرض ... ونعيم الدنيا الذائل
كلو معاكم وما كفاكم
حتى القرش إن فاتكم للبستاهلو
تندموا ليش ما جاكم
المَلَك النازل فجراوي
وشايل أرزاق الخلق
الرقدوا رقاد
إنتوا تختفوا اللقمة الحفت من
جنحين المَلَك الرفت
وسيدا يموت بالفاق
العين إن زاغت شن بملاها خلاف مولاها
وبيتاً رملو دقاق

*************************

ها سكان القصر العالي وداع
يا سادات البرج العاجي وداع
ها نويسات البلد الغادي وداع
نتقابل يوم أنداد
ونصفي حسابنا الصاع بالصاع

***************************


توقيع :
  رد مع اقتباس
 
 
 
 
قديم 17-04-10, 11:38 AM   #9
قريرابي ذهبي
 
الصورة الرمزية محمد سليمان كارة





محمد سليمان كارة غير متواجد حالياً

من مواضيعي :
افتراضي رد: مكتبة الشاعر ود بادي

في رثاء الشاعر/ إسماعيل حسن


ارمي الدمعة فوق الدمعتين ياعين
بعد الليلة حابسها الدموع لي مين
نزيف الدنيا من حد البلد غربي
ونزيف الدنيا لاحد البلد شرقي
وجوم عامة الليالي العامره
كل الدنيا خاتة الخمسة فوق اتنين
رحيلك وجعة يا سماعين
رحيلك نجعة من دار الفرح والزين
رحيلك طعنة في لهات الحبى دريفين
رحيلك وقفة فوق درب العليك باكين
فيها نهاية المشوار وحد الفرحة والامال
وحد الفال وحد الزين

ارمي الدمعة فوق الدمعتين ياعين
ويعد الليلة حابسها الدموع لمين
بعد نزلت سكاكين القدر
مسنونة ديل فوق ديل
وشربت من بكرينا المعتق
حالتو ياالداسنو من السيل
وياالمحزون وحرابنا متكلات قدامو
فوق مشنكسات الخيل
وياالداخرنو من زمن الحساب
شفعنا رابطين الحجر بالتيل
وفجاءة يجينا من طرف السماء مريسيل
ينعب فوق كلنكاكول غراب هابيل
ويبقي رحيل
رحيل كل الغيوم الهامعة متواسرات
رحيل كل الشهور العامرة بالخيرات
رحيل الطينة من طرف الجزر يومات
رحيل الخضرة قدام منجل الهدام جفاف وممات
رحيل البادية فوق برقا وراء نجيمات
رحيلك مو رحيل أفراد
رحيل اجيال
رحيل بلدا تمام وكمال
يا العرشت فوق نخل السواقي الشال
واتمددت فوق النيل من الشلال وللشلال
وياالهاجرت فوق ريش الرهو رحال
تظل مرسوم علي باب الليالي سؤال
بعد عشعشت في خاطر الغبش موال
واتبللت من الموية بين السعفة والبلال
بعد عرقك برق في ترابنا حد ما شال
واتمددت غادي وجاي يمين وشمال
بعد الحال
منو البقدر يجيب غربال يغربل روحك المدسوسة في الاجيال
وفي نفس الدغش مبثوثة في الشتلة ونداها السال
بعد الحال
منو البقدر يطاول حرفك المعقود
علي برقا حرير وهلال
مسطر فوق رقاب البرد
فوق الصخرة والتمثال
بعد الحال
رحيلك ياالمشرشر في مداخل الدنيا كالاوصال
رحيلك هزه في العقدة
ومجامع الروح كما الزلزال

ارمي الدمعة فوق الدمعتين ياعين
بعد اليلة حابساها الدموع لمين
كتير من شاف ديارو العامرة
هاجت فوق درب وداي
كتير من عدا فوق درباً
بلا يوادع بلا يناشد كبار القوم وياخد راي
كتير ياعين
كتير الغابوا ماحضروا
وكتير الراحوا ما عادوا
وكتير البمشوا منو جاي
الا الناعي
عمرو الناعي ما طاف البلاد من جم
وتبكي طويرة الاحزان سنين وسنين
مصيرة تساسق المسكينة بين الباسا والباساي
ترفرف من سخاي لسخاي
وتسال عن صدور مغسولة بالدوباي
و تنزل فوق حلقات مجالس الشاي
تقول الشيخ وفي الشاشاي
تبل الريق من الدمع البيوشل من ارامل الحي
وتشرق بالرحيح في الردحه و الووب احي
وتمرق من محاري الناس تولول فيها جرس الصي
وتصرخ فايقة ياجلابة اقيفوا لي
وتسعل ضايقة ما شفتوه زولا لي
تضيع فرخاتا في المجهول
ويرحل من دريبا الضي
آه آه ياطويرة الاحزان
آه لو كان تعرفي البي
جرحك انتي صاب الريش
وجرحا لي مسافر في النسيج الحي
دريبي بعيد وحزني فريد
ومما رحل البلبل الغريد
بسرح في عيون الناس
بسـأل ولوسؤالي يفيد
كيف الدنيا تصبح دنيا
والصيد يبقي ياهوالصيد؟
مين يقدر ينضم عقود منقوشة
ترقد في حزوز الجيد
ومين يضفر كلام الريد
كلو جميل مصيرو يجي ومصيرو يفوت بلاتخليد
كتاب الكون يظل مقفول
بلا خاتمة بلا تمهيد
وحتي النيل مصيرو يكون مجرد موية شاقة البيد
منو البيقدر يجيب ليكم خباراتو
رقصة موجو في الشاطئ
رواويسو , حكاياتو
رقاد القمرة جنب النجمة فوق رملا مراياتو
ولما تغيب ينوم النيل موشح بعباياتو
وزي ما النيل يضيع في الدلتا يتلاشي ويموت مشلول
انحنا كمان تفيض امالنا
تضيع تنشره في ساحل المجهول
وا اسفاي
وا اســــــــــفاي
وا اسفاي علي حرفاً شمخ في الطول
وكيف الليلة في بطن التراب مسبول
حرام تبلينا يا ايام
حرام تملينا شوق وهيام
اتارينا بنشيل من حرفك الجواني يا سماعين
ونقعد في حواشي الحضرة وانت تكب علينا غمام
وماعارفين حروفك نازفة من شريان
من دم القليب الاصلو مابريان
لما شربنا لما طربنا واتلفتنا ما لقيناك يا انسان
وشفنا روحيتك الشفافة ركبت هودج الاحزان
محمل فوق جناج ملكين
ودربو علي مشارف الواحد الديان
قوايمو شقايق النخل الوقع حزنان
مضفور بي سعف يابس
مفرش بي كباد اماتنا والحبان
مزمل بي حبال صبرا فقدناهو زمان
مضلل بالدموع شرقان ........
عجيب ياهودج الاحزان
مواسم الهجرة ما حانت ولا زمن الرحيل قد حان
نسافر ليك وزادنا الشربه من بحر الحزن والاهه والحرمان
وداك اليوم كان وداع الهودج المتهادي
كان جامع رجلات الحضر والريف
طيور السافل المحزونة جات بي ليله
تاركةجناها للريج والمطر والزيف
وروح ترهاقه والعباسي وروح أبواتنا
وريحة الماضي كلها جات
ملوك شايق .. وقف شاويش
منكس بي حرابو واقف بي قفاهو تابعو شايل سيف
وبعد الليلة كل بنية تلبس فوق صديره اكليل
يكون مزروع فيهو قلب الشهيد
وانت شهيدنا يا سماعين
يا الله .. يا الله .. يا الله
بعد ما شلت اسماعين
وفات
معاهو باقي كلام وباقي حنين
يالله بعد الفجعة نظل شاكرين
نظل واقفين علي بابك معاي طلبين
يكون عبود مع ود توم كذا شاهدين
قدام قبر الولي سماعين
نظل واقفين
يوم الليلة والباكر
الي ماشئت يالله
الي يوم الفصل والدين
وداك اليوم يكون يومنا
ونقالد شيخنا سماعين

وداك اليوم يكون يومنا
ونقالد شيخنا إسماعين

وداك اليوم يكون يومنا
ونقالد شيخنا إسماعين

  رد مع اقتباس
 
 
 
 
قديم 16-05-10, 11:08 AM   #10
قريرابي فضي
 
الصورة الرمزية عمر محمد الشيخ





عمر محمد الشيخ غير متواجد حالياً

من مواضيعي :
افتراضي رد: مكتبة الشاعر ود بادي



بت الخير يجيك الخير . وصل جوايك الكاتباهو للولد الحتالي
وكان الظن ترسلي ليه هين هينين من البركاوي
داك الطعمو حالي
ولو بالقل شخاليب دوم
وهنا والله ني ومسيخ وغالي
سؤالك يمة عن احوالي
كان شفتيها تغنيك عن سؤالي
انا اتوكرت في قلب البنادر
زي غريب شرقان مدلدل في الدوالي
جات شايلاني حرّة جوف
انا اتحديت مجالا مومجالي
مصايب الجامعة اكبر من جميع الشفتو
ولا سمعتو في ايام الخوالي
قعاد الكرسي كان شفتيهو
ورم ساقي زي سيد الزلالي
اقلب في الدفاتر من صباحا بدري
لامن تمسي ما بنسي انشغالي
اسوق الليل تحت ضوء الكهارب
وديمة هارب من فراشي
وياه حالي
ده كلو عشان اجيب نمرا
انافس بيها واستر بيها حالي والله عاد حالة ما بتسر البال
ومن يوم ما هديت ما انسر بالي
سلاطين العلم يايمة
ينسوا العشرة في فد يوم
يدفروك بره زي دفر الطبالي
وخايف من اجيك مرفود
وهادي الفكرة من ما جيت
معشعشه في خيالي
واخير افتح اضانك
قبل ما تلقي فوق اضني
ملويات حبالي
وكان حصل القدر يايمة لا تلوموني
لومي علي البنادر نورا اقوي من احتمالي
بناتا فيها رويانات جسومن بالدهون
تلصف بلا جلود السحالي
سبيبن ديمة بالحزم الكبار مبهول مردم
فوق قفاهن..وا حلالي
صدورن طامحة زي موية الدميري
الهايجي تكشح في العوالي
عيونن واسعة تبلع مية
زي ولدك تشرك للموحد والضلالي
وحاتك ضُمّه ما بقدر عليهن
ساعة اقيف قدامن
انكس راسي بي قدري وجلالي
مشيهن سوا زي سرب الغزال
لكن نفورن مو غزالي
عدادن مابخبرو
الا وين ما امشي الاقاهن قبالي
وقصاصن ينقّر بي عصاتو
ومايفرّق دربهن
من بين دريبات القماري
بخورن في سماء البندر
يدوخ متل مسك العشاري
رقيصن ينهزنو بلا الفلو
الّلماتو غابن منو في ضل الضهاري
يجمّع في قفاهو وينطرح
يتمطّى تتحتحت مفاصلو
وده ياهو الفاك جباري
دلالكين تجيب الضلّ
علي متاهات الضهاري
غناين اصلو ما سمعنابو
كنت بقول ليكي الا هسع ما ني طاري
وطنبورن مبرقع وحسو فاقع
لا في كنتر لا ودع فوقو بيراري
عشوقن في الرقيص
يتلوي متل سيد المغص
يوم يبقي في حالة طوارئ
والمداين ديمة فايري
زي وحوشا في البراري
والمـآسي كتيرة حاصلة
والمكضب يلاقي بوليس السواري
عاد دي حالتا بقدر اتستر معاها
خلاف احاكي الناس واجاري؟
وانتو راجيني يوم اجيكم بشهادتي
وينبسط ضهري وكباري
وبرضو خايفين من اجيكم بي غربية
وفي خجل قايد صغاري
والقدر بي غادي كاتب ليه شيتا
لاني حاري ولا ني طاري

حاجة واحدة تكون في علمك
اني جايي وتاني راجع لي دياري
وياني حمّيد القديم
الا بس فاقد حجابي وراح سواري
يمة كتري من رضاكي
وسلميلي علي المعاكي
وقولي لي حبوبة زيك
نحن شبنا وماك براكي
سلميلي علي جروفنا وحتى وزينا البكاكي
سلميلي علي بناتنا
وقولي ليهن ماني ناسي
طاري شلاخا مواسي
زي شقوق بيتاً سداسي
طاري نقشا فوق خدودن
بين ضفايرو وشوفو قاسي
جسمي في البندر ممدد الا بينكم بي حواسي
سلميلي علي البكادن والبشتت في التقاوي
في الكرد محراتو قالع
وصوتو فوق تيرانو عاوي
ماحزم بقجة ثيابو وقام فجر لاحق اللواري
اخيرو يحفر في جروفو
مالو مال حفر المجاري
سلميلي علي الضرايح
والفضل من الخلاوي
والفقير الفوق حصبرو
يكتب البخرة ويداوي
مع السلامة ودعتك الله
ولي وصيتك ماني ناسي
لي شفقتك مافي داعي
وابقي عشرة الراعي واعي
في بحور اهل البنادر من زمن طالق شراعي
كان نحجت بجيك غانم
(وكان فشلت بجيك ضراعي)


توقيع :
القريــــر يا بلــدي الحبــيب فيك طيــبة وياك منبئعــة
فيـــك من الحـــور الحسان والحســان دارة ومرتعـة
القريــر واحــات للجمال صــورة من ابــهى روائعة
الخضار النيـل والحســان جــلى من ابــدع وصنّعَــة
تلقــى انفــاسها مع الصــباح ردَّ روحك وليك رجعـة


ستظل باقياً فينا ايها المجاهد
  رد مع اقتباس
 
 
 
 
قديم 18-05-10, 12:55 AM   #11
قريرابي ذهبي
 
الصورة الرمزية اسماعيل علي حامد





اسماعيل علي حامد غير متواجد حالياً

من مواضيعي :
افتراضي رد: مكتبة الشاعر ود بادي

الطنبور



الطنبـــور اذا ما نـاح مع غنايو عكـــس الريــــح بجـــينا

والسلكايا ترحل بالنــفوس الــهايمة عــاد تــخرب علــينا

قلوبنا الهــايمة تتفقش مـع الوتر الــحنين ترقــد عــجينة

ونسري الليل نسوقو مع المحبين البحازو علي المدينة

اوتارك تنوح والزول يقول مقطوعة من ريشات حسونة

وجوفك ياهو جوف محزونة حرقو حشاها في نورا وخزينة

نسمع فيك من ماقمنا شان تروينا ..منك لا شبعنا ولا روينا

نصحي الماضي ونار الشوق تقيده مقاطع النغمة الحنينة

والطنبور نغيمتو مع نسايم الليل بلا خاطرنا ترحل تسري فينا

تهود بينا في وادي الشمال والروح تروح بين بشائر بكرة
والذكري الدفينة

  رد مع اقتباس
 
 
 
 
قديم 21-05-10, 05:47 PM   #12
قريرابي ذهبي
 
الصورة الرمزية اسماعيل علي حامد





اسماعيل علي حامد غير متواجد حالياً

من مواضيعي :
افتراضي رد: مكتبة الشاعر ود بادي

مقطع شعر
ود بادي


ياديار حوا المراقدك في رويس عبدلة وينك
يا المشاوير المشيتك . يا المشارع السالكة وينك
بالي فيكي إلا درب العيشة باعد بيني بينك
يا لبينة المغربية النازلة من أطراف سعينك
يا السرابة الحبلى كل الناس تعاين لي جنينك
يا السبايك الساوي شيلك ولا طويرة الجنة تسكر من مدينك
يا السواقي النايحة زيك زي حنان اماتنا في حرقة حنينك

  رد مع اقتباس
 
 
 
 
قديم 21-05-10, 06:06 PM   #13
قريرابي ذهبي
 
الصورة الرمزية اسماعيل علي حامد





اسماعيل علي حامد غير متواجد حالياً

من مواضيعي :
افتراضي رد: مكتبة الشاعر ود بادي


لو عقال وبتخافوا الشماتة
عاد شن لينا في الريلة وحلاتة
ملكة صولجان فوق السباتة
جرينا وراها مسخرة وانصياطة
لا بجيبه سبحة ولا حواطة
كمان لحالنا فينا ولا هراتة
ونحنا صبرنا كملنا السماتة
نقول نرجاها طلقانة بتلاتة
وما بندور خراب بيته وشتاتة
ومابنطيق بلاها العيشة ذاتة
اخير يا ابو الحسن نركب همباتة
زي ناس طه نسعل من جهاتة
نهود في البطانة مع رعاتة
ونملا عيونا من خيرة ونباتة
وناكل من فطيره ومن سلاتة
نغني مع المهاجريه ورواتة
نشوف الصيده نتوكد صفاتة
جيدة وروق ضميرة وكاحلاتة
وننزل فوق ديوم مدني وبناتة
ونمشي علي فريق الريلة ذاتة
سور في سور وفوق ادوار تلاتة
نعقل الراحلة في عتبة بلاطة
ونمشي القدلة فوق سيفه وصراطة
ونتـبســم مع نيــران حـمــاتــة
ونمشي حفايه فوق ريشه وبساطة
ونعزل صورة فيها حلات سماتة
نضاري سماحة زي شامة البخاتة
ندسها في السديري عشان حلاتة
ونخلف ساقنا روقة وانبساطة
نحادي القافلة بالقلعة وحصاتة
نرصو مشينا زي ابر الخياطة
ونصبح في البلد نلحق صلاتة
معانا الصورة صورة الملكة ذاتة
نبروزه بالدهب بندور محاطة
نعلي مقامة نحلف بي حياتة
نغازل فيها والرضا في سكاتة
نعيش الدنيا بين جوز كاحلاتة
رخام بابل مجلي مفدعاتة
حمام الكعبة راقص طاعناتة
محيط الهندي موجو تنهداتة
مضيق طارق نحيل زي خاصراتة
الموناليزا نحنا عمرنا فاته
ولدو المقدرة ونار الله جاتة
وكان عقال تعرفو السمحة ياتة
الحورية ابت قطعت صلاتة
كفانا الصورة نقرا تأملاتة
عجوة نوري كان زادت غلاتة
تغلب الفقري يعشم في نواتة

آخر تعديل اسماعيل علي حامد يوم 21-05-10 في 07:13 PM.
  رد مع اقتباس
 
 
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع

---
شارك هذا الموضوع مع أصدقائك على الفيس بوك
Share

الساعة الآن »05:17 PM.


Powered by vBulletin® Version 2014
.Copyright ©2000 - 2014, Jelsoft Enterprises Ltd
جميع الحقوق محفوظة لمنتديات القرير .Copyright ©2008- المواضيع المكتوبة تعبر عن رأي كاتبيها ولا تعبر عن رأي ادارة منتديات القرير free counters
شركة نوفــ العربية ــل